Read dhopadhola Wok 17 Bible Online

Wok 17 - dhopadhola bible

Wok 17

¹Joisiraili je joeye i thim ma Sin, ka jowotho wok i kabedo acel kidho i man cungo kwoŋ cik pa Rwoth. Joketho kambi i kabedo m'ilwoŋo ni Refidim, to pi oyido ongoye kenyo ma jomadhi.

²Jogeŋisa ri Musa to jowaco ni, “Miy wan pi amadha.” Musa odwoko ni, “Raŋo wigeŋisa? Raŋo witemo Rwoth?”

³To riyo pi oyido neko ji swa, aka jomedere kigeŋisa ri Musa. Jowaco ni, “Raŋo iwodho wan wok i Misir? Bino neko wan, nyithindho mawan g'ogwaŋe mawan gi riyo pi.”

⁴Musa oywaki ri Rwoth, “Aŋo ma tim gi ji me? Jocegin lilan gi tele.”

⁵Aka Rwoth owaco ri Musa ni, “Kwany jotel pa Joisiraili moro, aka iluw ruwaŋ ji. Kadhi gi luth ma i oro ma goyo wi malawa Nayil.

⁶Neni, abino cungo ruwaŋin kenyo i tele i got Sinai. Goy tele gi luth, aka pi lawok iye ri ji jowomadhi.” Musa otimo ameno, ruwaŋ jotel pa Joisiraili.

⁷Aka kabedo no ocwoki ni Masa kodi Meriba,[5] kwoŋbedo Joisiraili jogeŋisa to jotemo Rwoth kenyo munyo jopenjo ni, “Rwoth nitie gi wan, kosa be?”

⁸Kenyo Joamalek jobino lweny gi Joisiraili i Refidim.

⁹Musa owaco ri Yosuwa ni, “Yer riwan cwo moro jokidhi jowolweny gi Joamalek dikin. Abino cungo i wi tendere gi luth pa Were i cingan.”

¹⁰Ameno Yosuwa otimo paka Musa owaco rigo, aka jolwenyo gi Joamalek, kareno Musa, Aron, kodi Hur joidho malo i wi tendere.

¹¹Kisi ka Musa otiŋo cinge malo, Joisiraili joloyo, to k'odwoko piny, Joamalek jocako loyo.

¹²Munyo cingi Musa jojony, Aron gi Hur jokelo rigo tele ma bedo, to jocungo i thenge mako cingi go malo, ma kiyengere cuka waŋceŋ opodho.

¹³I nger me Yosuwa okengila Joamalek kicutho.

¹⁴Kenyo Rwoth owaco ri Musa ni, “Waci ri Yosuwa wondiki gime i kitawo ŋey wopoy. Waci ri Yosuwa nike abino reyo Joamalek kicutho.”

¹⁵Musa ogeto migam aka ocwoko ni Rwoth obedo bendera paran,

¹⁶ka waco ni, “Tiŋi malo bendera pa Rwoth. Rwoth lamedere lweny gi Joamalek i luse je.”