Read dhopadhola Wok 18 Bible Online

Wok 18 - dhopadhola bible

Wok 18

¹Yethiro or Musa, aka jacway ri Were i wi migam ma Midian owinjo kwoŋ gima Were oyido otimo ri Musa kodi Joisiraili munyo otelo jo wok i Misir.

²Onyo Yethiro obino, aka okelo cipa Musa m'oyido owey cen,

³kodi wot Musa ario, Gerison ma nyinge nyutho ni oyido abedo jawoth i piny pa jopath,

⁴aka man oyido ilwoŋo ni Elieza kole owaco ni, “Were pa baba okonyan to bothan, kwoŋ abor pa Farawo.”

⁵Yethiro obino gi cipa Musa gi wote ario i thim kama Musa oyido oketh'iye kambi i got maleŋ.

⁶Yethiro oyido odhiro rigo wac nike jobino,

⁷ameno Musa owok romo gi go, okule piny, aka ocwiyo lembe. Jopenjere kwoŋ kwo pajo to jodonjo i wema pa Musa.

⁸Musa owaco ri Yethiro kisi gima Rwoth otimo ri Farawo gi Jomisir ŋey wobothi Joisiraili. Go bende owaco ri Yethiro kwoŋ dinyo ma ji joneno i yo kodi nger ma Rwoth obotho iye jo.

⁹Munyo Yethiro owinjo gime je, osangala

¹⁰aka owaco ni, “Rwoth wopak m'obotho win wok i cingi Farawo gi Jomisir. Rwoth wopak m'obotho ji pere bedo ŋecin!

¹¹Onyo pama aŋeyo nike Rwoth dwoŋ loyo werin je, kwoŋbedo obotho ji pere wok i cingi Jomisir munyo oyido jotero jo gi cay.”

¹²Kenyo Yethiro omiyo mic awaŋa gi cowirok man ri Were, aka Aron obino gi jotel pa Joisiraili je to jocamo mugat kanyacel gi or Musa ruwaŋ Were.

¹³Yawere Musa oyido winjo banjin i dier ji, aka obedo gi tic wok odikin kiri wor.

¹⁴Munyo Yethiro oneno kisi gima Musa oyido timo ri ji, openjo ni, “Me je ginaŋo m'itimo ri ji? Raŋo itimo gime je kendin, gi ji cungo ka wok odikin tundo othieno?”

¹⁵Musa odwoko ni, “Kwoŋbedo ji jobino bongan ŋeyo mito pa Were.

¹⁶Ka j'ario jonitie gi dhaw, jobino bongan t'awaco ŋat'otire, aka bende awaco rijo or gi cik pa Were.”

¹⁷Kenyo Yethiro owaco ri Musa ni, “Gim'itimo kiber.

¹⁸In kiri gi ji je wibino ol. Gime dit rin timo kendin.

¹⁹Onyo winjan, abino miyin rieko aka Were bino bedo kodin. Otire rin pido ri ji ruwaŋ Were t'ikelo dhaw pajo rigo.

²⁰Iripo fonjo jo or pa Were kodi tito rijo nger ma joripo woth'iye, kodi gima joripo timo.

²¹To medo i wi meno, iripo yero cwo ma jonitie gi nyalo, ma jolworo Were, ma jogenere, aka jokijol nyew. Ikethi jo telo ji i kitipa ma ganin, miya, piero abic, kodi apar.

²²Weyi jowothum banja kisi hongo. Banjin matek mere jowokeli rin, aka mathindho mere jowothum. Meno bino loko rin tic mayot, ka bende jotiŋo bieto me kodin.

²³K'itimo gime, paka Were wodho or, in won ikibino ol, aka ji me je jonyalo dok munyo dhaw pajo okwey.”

²⁴Musa otero rieko pa Yethiro

²⁵aka oyero cwo ma jonitie gi nyalo wok kwoŋ Joisiraili. Oketho jo telo kitipin ma ganin, miya, piero abic, kodi apar.

²⁶Jothumo ri ji banja kisi hongo; matek mere jotero ri Musa, aka mayot mere jo wegi jothumo.

²⁷Kenyo Yethiro osewila Musa, to Yethiro dok peco.