Read dhopadhola Wok 2 Bible Online

Wok 2 - dhopadhola bible

Wok 2

¹I hongo me jacwo moro ma janono pa Benyamin onywomo dhako ma bende janono pere

²aka dhako no ogamo iye to nywolo rigo wode. Munyo dheno oneno nger ma wode ŋon iye, okano go ma dwe adek.

³To munyo go k'onyalo kano wode loyo kenyo, ocweyo adita gi midole aka ofuyo iye gi gima geŋo pi donjo iye to ketho wode iy'adita no. Dheno otero nyathi no to ketho i lum midole maboyo dho thengi malawa.

⁴Aka nyamin nyathi ocungo gi bor neno gim'otimere rigo.

⁵Nyar Farawo obino piny lwoki i malawa, aka jotic pere oyido jowotho i thengi malawa. Nyar Farawo oneno adita i lum midole, aka ooro jatic pere kwanyo.

⁶Oyawo aka oneno nyathi, aka neni nyathi oyido ywak. Omako wor gi nyathi to waco ni, “Me acel kwoŋ nyithindho pa Joebulaniya.”

⁷Kenyo nyamin nyathi owaco ri nyar Farawo ni, “Akadhi alwoŋ acel kwoŋ mon Joebulaniya wopidi rin nyathi?”

⁸Nyar Farawo odwoko ni, “Kadhi” Ameno nyako no okidho to lwoŋo yok nyathi won.

⁹Aka nyar Farawo owaco ri dheno ni, “Ter nyathi me ipidi ran, abino culin misara.” Ameno dheno otero nyathi no to pido.

¹⁰Rumacen munyo nyathi odongo, dheno otero go bongi nyar Farawo, m'otero go paka wode. Aka nyar Farawo ocwoko nyinge ni Musa[1] to waco ni, “Aywayo go woko wok i pi.”

¹¹Munyo Musa otieko dongo, okidho wendo ri ji pere Joebulaniya aka oneno nger m'oyido iromo iye jo timo tic matek. Go oneno kiri munyo Jamisir neko Jayuda acel kwoŋ ji pa Musa won.

¹²Musa oŋiyo thenge gi thenge, aka oneno nike oyido ongoye ŋata neno go, aka oneko Jamisir to yiko delkwoŋe i kwoyo.

¹³Yawere Musa ogik to neno cwo ario ma Joebulaniya jogore. Aka owaco ri ŋat'oyido okom mere ni, “Raŋo igoyo Jayuda nyawotin?”

¹⁴Jalo odwoko go ni, “Ŋa m'okethin bedo jadhum kodi jathum banja? Imito nekan paka ineko Jamisir” Aka Musa obedo gi lworo to waco ni, “Adieri gime oŋeyere.”

¹⁵Munyo Farawo owinjo gime, odwaro neko Musa. To Musa oringo aka oeye woko i waŋ Farawo to kidho i piny Midian kam'obedo piny cegin gi waŋ pi.

¹⁶Onyo jacway ri Were i wi migam ma Midian oyido nitie gi nyike abirio, aka jobino jotwomo pi to jopoŋo i wer ri mwendi pa bajo.

¹⁷To jokwath rombo moro jobino to joriemo jo. Kenyo Musa oay aka okonyo jo to miyo mwendi pajo pi.

¹⁸Munyo jodok bongi bajo Yethiro, openjo jo ni, “Raŋo konon widwoko con?”

¹⁹Jodwoko ni, “Jamisir moro obotho wan wok i cingi jokwath rombo aka bende otwomo riwan pi ma romo to miyo mwendi.”

²⁰Go openjo nyike pere ni, “Go nikune? Raŋo wiweyo jalo woko kenyo? Lwoŋ win go wocam mugat.”

²¹Ameno Musa oyeyo bedo kenyo, aka Yethiro omiyo go nyare m'ilwoŋo ni Zipora i nywomirok.

²²Zipora onywolo ri Musa wode to cwoko nyinge ni Gerison kole owaco ni, “Abedo jawoth i piny pa jopath.”

²³Munyo oro moro okadho, kere ma Misir otho aka Joisiraili oyido fodi joywak i twec pajo, aka joywak ri kony. Ywak pajo otundo malo bongi Were

²⁴m'owinjo ywak pajo aka opoyo cikirok pere gi Abraham, Isaka, kodi Yakobo.

²⁵Aka Were oŋiyo candirok pa nyithindho pa Isiraili to dewo kwoŋ jo.