Read dhopadhola Wok 23 Bible Online

Wok 23 - dhopadhola bible

Wok 23

¹ “Ikir'inyay wac pokopoko, kosa imakere gi ŋatarac bedo jakony ma twodo.

²Ikir'iluw lwak ji i timo reco, kosa ka jomiyo jakony wiro tiro.

³Ikir'itim nyakucel ri jacandi i kapido.”

⁴ “K'inwaŋo dhiaŋ kosa punda pa jakwor perin m'orwenyo, iripo dwoko rigo.

⁵K'inen punda pere opodho gi gim'otiŋo, kony go wotiŋ malo punda; ikir'ikali go.”

⁶ “Ikir'ikwer miyo jacandi tiro k'obino i kapido.

⁷Ikir'isegeya ma nono, aka Ikir'ineki ŋata k'otimo banja gi jom'otire, rupiri abino thumo banja ri jokidakana.

⁸Ikir'ijol nyew, rupiri nyew coro waŋ jo ri gim'otire aka dwanyo banja pa jom'otire.”

⁹ “Wikiri witer japath marac, wiŋeyo gima bedo japath nyutho rupiri oyido wibedo jopath i Misir.”

¹⁰Ma oro aucel wicwoy kodhi i ndelin mewin to wikeco nyak mere,

¹¹to i oro mar'abirio, wiwey woywomere, aka wikiri wikec gimoro je ma odongi iye, ŋey jocandi jowocami gim'odongi kenyo, aka ogwaŋe madudi jowocami gim'odoŋ'iye. Wilatimo gimoro acel i ndelo vini mewin gi yen vini mewin.

¹² “Tiyi win ma ndelo aucel, to i ndelo mar'abirio wiripo ywomirok, ŋey ŋecin mewin gi jopath ma jotiyo riwin, kiri g'ogwaŋe mewin bende jowoywomere.”

¹³“Winji win kisi gim'atieko waco riwin. Wikiri wikway werin man, wikiri wituci kada nyingi gin.”

¹⁴“Tim ran win kalima adek i kisi oro.

¹⁵I dwe ma Abib, dwe ma wieye iye wok Misir, tim win kalima ma mugat ma buthow paka amiyo win or. Wikiri wicam mugat moro je gi thow i hongo ma ndelo abirio ma kalima me. Wongoye ŋata wobin laman m'ongoye mic.”

¹⁶ “Witim kalima ma keco, ka wicako keco cemo mewin.” “Tim win kalima ma kayindi ka oro rumo, ka wicoko ranyak mewin wok i ndelin mewin.

¹⁷Kisi oro ka witimo kalima adek me, cwo mewin je joripo bino lamo Rwoth Were mewin.”

¹⁸“Wikiri wimiyan mugat m'otimi gi thow ka wimiyan cowirok ma le, kosa wiwey bor ma le wobedi kiri yawere odikin.”

¹⁹ “Kisi oro keli win ŋano ma wikeco marapena i Ot pa Rwoth.” “Wikiri witedi nyathi diel i cak pa min.”

²⁰Neni, aoro malaika yuwiy win, gwoko win ka wiwotho, kodi kelo win i kabedo m'atieko yiko.

²¹Cik win ithi win aka wiwinji go. Wikiri wigwenyere kwoŋe, rupiri aoro go aka k'ocwaki reco mewin.

²²To ka winowinji go to witimo kisi gim'amiyo win cik timo, abino lwenyo gi jokwor mewin je.

²³Malaika paran bino telo win to kelo win i lowo pa Joamor, Johiti, Joperiz, Jokanan, Johivi, kodi Joyebus, aka abino reyo jo.

²⁴Wikiri wikule piny ri werin pajo to wilamo jo, aka wikiri wicaki timo tim manyadini pajo. Nyek win werin pajo to wituro sirin pajo ma telin.

²⁵Ka wilaman, Rwoth Were mewin, abino miyo win silwany ma cemo gi pi, t'abotho two mewin je.

²⁶I lowo mewin ongoye dhako ma iye bino podho woko, kosa ma bino bedo kinywol. Abino miyo win kwo mabor.

²⁷“Abino miyo ji ma jogwoŋa gi win lworan. Abino kelo nyawin i dier ji ma wilwenyo gi jo, aka abino miyo jokwor mewin wirok to joringo kwoŋ win.

²⁸Abino miyo jokwor mewin kirin. Abino riemo Johivi, Jokanan, kodi Johiti kwoŋ win.

²⁹Ak'oriem jo woko i oro acel, kosa piny mewin nyalo doŋ m'othangere to ogwaŋe madudi jobedo madit riwin.

³⁰Kwanyowoko, abino riemo jo mothmoth, cuka winomedi nyay to wiloko amewin.

³¹Abino ketho kew mewin wok i Nam M'obokere kiri i nam pa Jofilistia, kodi wok i thim tundo i malawa Yufrete. Abino miyo win meni kwoŋ ji je aka wibino riemo jo woko kwoŋ win.

³²Wikiri witim cikirok gi jo kosa gi werin pajo.

³³Wikiri wiyey jowobedi i piny mewin. Ka winoyey jo, jonyalo miyo win timo reco kwoŋan. Ka wilamo werin pajo bino bedo bwo riwin ma tho.”