Read dhopadhola Wok 25 Bible Online

Wok 25 - dhopadhola bible

Wok 25

¹Rwoth owaco ri Musa

²“Waci ri Joisiraili jowomiyan mic. Jol mic moro je ma nyatoro mito miyo.

³Mic no wobedi, zahabu, feza, ywel,

⁴nangin mafoth, manyabululu, manyarangi ariŋo, kodi pien rombo m'obokere, nanga m'otimi gi yer diel,

⁵piendere wot rombo m'owir m'obokere, piendere diegi, mbawo kasia,

⁶mo talin, gigipiny manitie gi kur mamit ma ruwo gi mo ma wir kodi ri buban manitie gi kur mamit,

⁷Telin ma welo m'obokere obokere, kodi telin ma tweyo ri law pa jadwoŋ pa jocway ri Were i wi migam kodi ri mugowa ma ketho giŋeyo mito pa Were.

⁸Ji joripo geto ran wema maleŋ, ŋey anyal bedo i dier jo.

⁹Tim win kodi gigipiny ma iye i nger can m'akidho nyuthin.”

¹⁰“Jowotimi ran Kakan ma Cikirok wok kwoŋ mbawo kasia, boro mere wobedi inci piero aŋwen g'abic, laco inci piero ario g'abirio, kodi ŋawirok inci piero ario g'abirio.

¹¹Woum iye gi dieŋeye kodi zahabu macil thoko, aka wokethi miango ma loko maŋon thoko.

¹²Wotim rigo petin aŋwen ma zahabu t'iriwo gi tiende aŋwen, petin ario i kisi thenge.

¹³Wotim gute ma kasia aka woum gi zahabu

¹⁴t'irwako jo i petin ma kisi thengi Kakan ma Cikirok.

¹⁵Gute no joripo doŋ i petin aka kiripi fudho woko jo.

¹⁶Kenyo oketh'iye telin mapando ario m'ondik'iye Or.”

¹⁷“Jowotimi giumo gi zahabu macil, boro mere inci piero aŋwen g'abic, aka laco inci piero ario g'abirio.

¹⁸Wotim cwec ma jobwombi gin ario gi zahabu m'ocadhi,

¹⁹acel ri kisi gike ma giumo. Wotim ŋey joworom giumo.

²⁰Cwec ma jonigi bwombi gin jowoŋiyere karo giumo, aka bwombi gin woumi.

²¹Wokethi telin mapando ario i Kakan ma Cikirok, t'iketho giumo i wiye.

²²Abino romo kodin kenyo, aka i wi giumo i dier cwec ma jobwombi gin, abino miyin cik je ri Joisiraili.”

²³“Wotim meza wok kwoŋ mbawo kasia, boro mere inci piero adek g'aucel, laco inci apar g'aboro, aka ŋawirok inci piero ario g'abirio.

²⁴Woum gi zahabu macil aka wothok gine.

²⁵Wotim miango mere ma inci adek i laco, aka wothok gi zahabu.

²⁶Wotim petin aŋwen gi zahabu t'iketho i sonda aŋwen, kama tiende jonitie iye.

²⁷Petin ma thielo gute ma tiŋo meza wokethi cegin gi miango.

²⁸Wotim gute ma mbawo kasia, t'iumo gi zahabu.

²⁹Wotim sendere, kikopere, agwatin, kodi atewe m'ilaoro i mic ma vini. Joje wotim gi zahabu.

³⁰Meza no wokethi ruwaŋ Kakan ma Cikirok, aka i meza no noknok wobedi mugat maleŋ m'imiyan.”

³¹“Wotim raŋaw tala gi zahabu macil. Pende gi kore wotim gi zahabu m'ocadhi. Raŋaw tala gikululu kodi mawuwin mere iripo timo wok kwoŋ zahabu m'ocadhi

³²gi jange aucel, adek i kisi thenge.

³³Kisi jange wobedi gi mawuwin adek ma cale gi thiw yath alimond gi jange kodi thiwe.

³⁴Kor raŋaw tala ripo bedo gi mawuwin aŋwen ma cale gi thiw yath alimond gi jange kodi thiwe.

³⁵Ripo wobedi mawuwa kama kisi jange wok kwoŋ kore.

³⁶Mawuwin, jange kodi raŋaw tala iripo timo gi zahabu macil m'ocadhi.

³⁷Wotim talin abirio ri raŋaw tala, aka wokethi jowoliel ŋiyo yuwiye.

³⁸Wotim lew jo gi siniyin pajo gi zahabu macil.

³⁹Woor kilo piero adek g'abic ma zahabu macil ma timo raŋaw tala gi gigipiny mere je.

⁴⁰Wonen nike otim jo i can m'anyuthin wi got.”