Read dhopadhola Wok 3 Bible Online

Wok 3 - dhopadhola bible

Wok 3

¹Onyo Musa oyido kwayo mwendi pa Yethiro ba cege, aka jacway ri Were i wi migam ma Midian. Otelo mwendi pere kadho yupodho ceŋ ma thim aka obino i got Horeb (Sinai) got pa Were.

²Kenyo malaika pa Rwoth omenyere rigo i mac maliel wok i kasugu dudi. Musa oŋiyo, aka neni, dudi oyido kiwaŋ.

³Aka Musa owaco ni, “Me gidhier, raŋo kasugu dudi kiwaŋ? Abino core cegin anen.”

⁴Munyo Rwoth oneno nike Musa core cegin, Were olwoŋo go wok i kasugu dudi, “Musa, Musa!” Musa odwoko ni, “An e.”

⁵Kenyo Were owaco ni, “Ikir'icore cegin, luny war perin wok i tiendin, kole kabedo m'icung'iye leŋ.

⁶Abedo Were pa benin, Were pa Abraham, Isaka, kodi Yakobo.” Aka Musa okano waŋe, kole go oyido lworo neno Were.

⁷Kenyo Rwoth owaco ni, “Atieko neno litho pa ji paran ma jonitie i Misir, aka atieko winjo ywak pajo ro ji ma jodiyo jo; aŋeyo kidamba pajo,

⁸aka ameno aloro piny gonyo jo wok i cingi Jomisir, kodi kelo jo malo wok i lowo no kadho i lowo maber aka lac, lowo ma mol gi cak kodi mo kic, kama Jokanan, Johiti, Joamor, Joperiz, Johivi, kodi Joyebus pama jobed'iye.

⁹Aka onyo pama, neni, ywak pa Joisiraili obino bongan, aka atieko neno nger ma Jomisir jodiyo iye jo.

¹⁰Biye, abino orin bongi Farawo ŋey inyal wodho ji paran, wot Isiraili wok i Misir.”

¹¹To Musa owaco ri Were ni, “An a ŋa ma ripo akadhi bongi Farawo, to awodho Joisiraili wok i Misir?”

¹²Were odwoko ni, “Abino bedo kodin, aka me bino bedo ranyuth rin, nike atieko orin. K'itieko wodho jo wok i Misir, wibino laman wi got me.”

¹³Kenyo Musa owaco ri Were ni, “K'anokidhi bongi Joisiraili t'awaco rijo ni, ‘Were pa kwarere mewin ooran bongi win.’ Jobino penjan ni, ‘Nyinge ŋa?’ Adwoki jo nedi?”

¹⁴Were owaco ri Musa ni, “Abedo ŋata Abedo” Aka Were owaco ni “Waci gime ri Joisiraili, ‘Abedo ooran bongi win.’ ”

¹⁵Were owaco ri Musa kendo ni, “Waci gime ri Joisiraili ni, ‘Rwoth pa kwarere mewin, Were pa Abraham, Isaka, kodi Yakobo ooran bongi win.’ Me nyingan cil gi cil, me apaka luse ma yuwaŋe je jolalwoŋan.

¹⁶Kadhi icoki jotel ma Isiraili je aka iwaci rijo ni, ‘Rwoth, Were pa kwarere mewin, Were pa Abraham, Isaka, kodi Yakobo omenyere ran.’ Waci rijo ni abino bongi jo aka atieko neno gima Jomisir jotimo rijo.

¹⁷Atieko yere wodho jo wok i Misir, kama jonitie iye i litho kelo jo i lowo pa Jokanan, Johiti, Joamor, Joperiz, kodi Joyebus, lowo ma mol gi cak kodi mo kic.”

¹⁸“Jobino winjo dwondin, aka in gi jotel pa Joisiraili wiripo kidho bongi kere ma Misir to wiwaco rigo ni, ‘Rwoth, Were pa Joebulaniya, omenyere riwan. Onyo yey wan wawothi ma ndelo adek kadho i thim, ŋey wamiy Rwoth Were mawan cowirok.’

¹⁹Aŋeyo nike kere ma Misir kilayeyo win kadho kwanyo woko k'orom go gi cingi jo ma meni.

²⁰T'abino telo cingan to agoyo Misir gi gir'aura m'abino timo iye, rumacen ma gino go bino yeyo win kadho.

²¹Aka abino miyo Jomisir woro win, aka ka wikadho, wikibino kadho gi cingi win nono.

²²To kisi dhako Jaisiraili bino kidho bongi jager pere kodi bongi dhako Jamisir ma bedo i ot pere aka bino kwayo nangin kodi thiwino ma zahabu gi feza. Joisiraili jobino ketho gigipiny me kwoŋ nyithindho pajo to jokadho gi lim pa Jomisir.”