Read dhopadhola Wok 30 Bible Online

Wok 30 - dhopadhola bible

Wok 30

¹“Tim migam ma waŋo buban.

²Wobedi inci apar g'aboro i boro, inci apar g'aboro i laco, kodi inci piero aŋwen g'abic i ŋawirok; tunge mere i kisi sonda aŋwen jowobedi marom gine.

³Ium wiye, thenge aŋwen je, kodi tunge gi zahabu macil, aka ikethi miango ma zahabu thoko.

⁴Tim petin ario ma zahabu ma tiŋo aka iriw jo piny ma miango i thenge ario jowomaki asu ma tiŋo gine.

⁵Tim asu me wok kwoŋ mbawo kasia aka ium gi zahabu.

⁶Kethi migam me woko ma nanga ma liero ruwaŋ Kakan ma Cikirok. Kenyo a kabedo m'abino rom'iye kodin.

⁷Kisi odikin ka Aron bino cwinyo tala wowaŋ buban maŋwe kur mamit i iye.

⁸Go ripo timo ameno ka cwinyo talin othieno. Mic ma buban womedere ma k'owir i hongo je ma bino.

⁹Ikir'imiy i migam me buban ma kileŋ, cowirok awaŋa, kosa mic ma ŋano, aka ikir'ikonji vini moro je i iye.

¹⁰Dicel kisi oro Aron wotim'iye kwer ma lonyo migam to ketho i tunge mere remo mar'ogwaŋ ma cowirok. Gime iripo timo kisi oro i hongo ma bino je. Migam me ripo bedo maleŋ kicutho, m'omiyere ran, Rwoth.”

¹¹Rwoth owaco ri Musa ni,

¹²“K'ikwano welo Joisiraili, wac ri kisi nyatoro woculi welo ma kwo pere, ŋey thoyamo wokiri wobin kwoŋe k'ikwano jo.

¹³Kisi nyatoro m'okwan ripo culo pesa ma mitere aka wopima gi rapim m'ioro. Kisi nyatoro ripo culo paka mic ran.

¹⁴Kisi nyatoro m'okwan i kwanirok, meno kisi jacwo ma jaoro piero ario kosa kalo ripo culo mic pa Rwoth.

¹⁵Jaŋaŋo wokiri woculi maloyo, aka jacandi wokiri woculi manok, ka joculo mic pa Rwoth ri kwo pajo.

¹⁶Coki pesa me wok bongi Joisiraili aka ior ma kuro Wema Maleŋ. Pesa labedo cul ri kwo, aka abino poyo kikwonga jo.”

¹⁷Rwoth owaco ri Musa ni,

¹⁸ “Tim kalaya gi pende ma ywel. Kethi i dier Wema Maleŋ gi migam aka ikonj'iye pi.

¹⁹Aron gi wote jolalwoko tiendi gin gi cingi gin

²⁰kafodi jok'odonjo i wema kosa corok i migam miyo mic ma cemo manyinge. Ameno kilaneko jo.

²¹Joripo lwoko tiendi gin gi cingi gin ŋey jokiri jowotho. Me cik ma jo gi nyikway jo je joripo luwo cil gi cil.”

²²Rwoth owaco ri Musa ni,

²³“Kwany gigipiny manitie gi kur loyo kilo aucel ma sandi manitie gi kur mamit ma yath m'ilwoŋo ni mira, kilo adek ma gim'onuŋere manitie gi kur mamit m'ilwoŋo ni cinamon, kilo adek ma midole manitie gi kur mamit,

²⁴kilo aucel ma kasia (joje pima gi rapim m'ioro). Imedi lita aŋwen ma mo

²⁵aka itimi mo ma wir maleŋ, m'oruw pa mo manitie gi kur.

²⁶Or ma wiro Wema Maleŋ, Kakan ma Cikirok,

²⁷meza gi gigipiny mere je, raŋaw tala gi gigipiny mere je, migam ma waŋo buban,

²⁸migam ma waŋo mic, kanyacel gi gigipiny mere je, kodi kalaya gi pende.

²⁹Imiyan gigipiny me i nger me, aka jobino bedo maleŋ kicutho, aka nyatoro kosa gimoro m'ogey jo bino miyo litho gi meni ma leŋo pajo.

³⁰Kenyo wir Aron gi wote, aka ikwoŋ jo paka jocway ri Were i wi migam jowotiy ran.

³¹Waci ri Joisiraili ni, ‘Mo maleŋ woor i tic paran i hongo ma bino je.

³²Kiripi konjo kwoŋ ji ma kisi ndelo, aka ikir'ior nger acel ma ruwo mo man ma cale gine. Leŋ, aka iripo tero paka gimaleŋ.

³³Ŋat'otim mo ma cale gine kosa oor kwoŋ ŋata k'obedo jacway ri Were i wi migam k'okwanere paka acel kwoŋ ji paran kendo.’ ”

³⁴Rwoth owaco ri Musa ni, “Kwany adec marom ma kisi gigipiny ma jonitie gi ŋwece kur me: Sitakite, onyca, galibanum, kodi buban macil

³⁵Or ma timo buban, m'oruw paka mo manitie gi kur. Medi cumbi woloki macil kendo maleŋ.

³⁶Odi adec mere wonuŋere, ter i Wema Maleŋ, aka ikiri ruwaŋ Kakan ma Cikirok. Ter buban me maleŋ kicutho.

³⁷Ikir'ior nger acel ma timo buban man ma cale gine riwin wegi. Ter win paka gimaleŋ m'omiyan.

³⁸Ka nyatoro otim buban ma cale gine ma oro paka mo manitie gi kur, go k'okwanere paka acel kwoŋ ji paran kendo.”