Read dhopadhola Wok 31 Bible Online

Wok 31 - dhopadhola bible

Wok 31

¹Rwoth owaco ri Musa ni,

²“Atieko yero Bezalel, wod pa Uri aka nyakwar Hur wok i nono pa Yuda,

³atieko poŋo go gi Cuny pa Were, atieko miyo go niaŋ, ndijo kodi nyalo ma kisi nger tic pac.

⁴Ndijo ma kidonya kodi timo jo gi zahabu, feza kodi ywel;

⁵ma ŋado telin ma ketho, ma payo mbawin kodi tic man je ma pac.

⁶Atieko bende yero Oholiab wod pa Ahisamak, wok i nono pa Dan, tiyo gi go. Atieko bende miyo nyalo madwoŋ ri jondijo man, ŋey jowonyal timo kisi gim'atieko wodho or ni wotim.

⁷Wema Maleŋ, Kakan ma Cikirok giumo, kodi gigipiny ma Wema je.

⁸Meza gi gigipiny mere je, raŋaw tala ma zahabu macil kodi gigipiny mere je, migam ma waŋo buban.

⁹Migam ma cowirok awaŋa gi gigipiny mere je, kalaya ma lwok gi pende,

¹⁰ruk maŋon ri Aron gi wote ma oro ka jotiyo ran paka jocway ri Were i wi migam.

¹¹Mo ma wir kodi buban ma nigi kur mamit ri Kabedo maleŋ. I timo gigipiny me je, jowotimi paka atieko wodho or.”

¹²Rwoth owaco ri Musa

¹³waco ri Joisiraili ni, “Kur win ndelo ma Sabato, ndelo ma ywomirok, rupiri obedo ranyuth i dier An kodi win ri kisi hongo ma bino, nyutho nike An, Rwoth atieko loko win ji paran.

¹⁴Wiripo kuro ndelo ma ywomirok, rupiri obedo ndelo maleŋ.” “Ŋata kikur je, to tiyo i ndelo no woneki.

¹⁵Winitie gi ndelo aucel ma timo tic mewin, to ndelo mar'abirio obedo ndelo ma cikirok ma ywomirok ri Rwoth. Ŋata timo tic moro je i ndelo no wonek.

¹⁶Joisiraili joripo kuro ndelo me paka cikirok.

¹⁷Obedo ranyuth makicutho i dier Joisiraili kodan, rupiri An Rwoth, acweyo polo gi piny i ndelo aucel, aka i ndelo mar'abirio atieko tic t'aywomere.”

¹⁸Munyo Rwoth otieko luwo gi Musa wi got Sinai, omiyo go telin mapando ario ma Were won ondik'iye or.