Read dhopadhola Wok 34 Bible Online

Wok 34 - dhopadhola bible

Wok 34

¹Rwoth owaco ri Musa ni, “Ŋadi telin mapando ario paka marapena, aka abino ndik'iye wac m'oyido nitie i marapena, m'ituro.

²Yikere dikin odikin, aka ibin malo wi got Sinai romo kodan i wiye.

³Wongoye ŋata wobin malo kodin, aka wongoye ŋata wonen iy'adec moro je ma got, aka wongoye rombo kosa dhok ma wokway i tiendi got.”

⁴Ameno Musa oŋado telin mapando ario paka marapena, aka yawere odikin maŋic otiŋo to tero malo wi got Sinai paka Rwoth oyido owodho or.

⁵Rwoth oloro piny i pondeponde, ocungo kenyo gi Musa, aka otuco nyinge maleŋ, Rwoth, Rwoth.

⁶Kenyo Rwoth oluwo ruwaŋ Musa aka olwoŋo, “An Rwoth, Abedo Were m'opoŋ gi wor kodi kisa, ma kimaki nge piyo aka nyutho mar makiwire kodi adieri.

⁷Akuro cikirok paran ri luse ganin t'acwako raco gi reco, t'akibino weyo m'akimiyo gir'acula nyithindho gi nyikwaye tundo i luse mar'adek gi mar'aŋwen ro reco pa jonywol pajo.”

⁸Musa okule piny i lowo piyo aka olamo Rwoth.

⁹Musa owaco ni, “Rwoth, k'adieri iwinjo kodan maber, akwayin ikadhi gi wan. Ji me wiy gin tek, to cwaki raco gi reco mawan, aka iyey wan paka ji perin.”

¹⁰Rwoth owaco ri Musa ni, “Onyo atimo cikirok gi Joisiraili. I waŋ jo abino timo gigipiny madongo nger mafodi akitimo kamoro je i piny i dier nonin je. Ji je jobino neno gigipiny madongo ma An Rwoth, anyalo timo, rupiri akidho timo gima kiwacere riwin.

¹¹Luw win or m'amiyo win konon me. Neni, abino riemo woko Joamor, Jokanan, Johiti, Joperiz, Johivi, kodi Joyebus ruwaŋ win.

¹²Wikiri witim cikirok gi ji ma piny ma wicegin kidh'iye, rupiri me nyalo bedo riwan bwo ma tho.

¹³Kwanyowoko, tur win migam pajo, nyek win sirin pajo, aka witoŋ piny cal ma were madhako pajo Asera.”

¹⁴“Wikiri wilam were man, rupiri An Rwoth, ajanyeko.

¹⁵Wikiri witim cikirok gi ji ma piny no, rupiri ka jolamo werin pajo manyakafir, jobino lwoŋo win riwirok gi jo, aka karatem nyalo mako win camo cemo ma jomiyo werin pajo.

¹⁶Wot win jonyalo nywomo nyir jopath, ma jonyalo miyo jo ngoye g'adieri ran to jolamo werin pa jopath.”

¹⁷“Wikiri witim to wilamo werin ma nyweny.”

¹⁸ “Kur win kalima ma mugat ma buthow. Paka amiyo win or, cami win mugat ma buthow ma ndelo abirio i dwe ma Abib, rupiri obedo dwe ma wiey'iye Misir.”

¹⁹ “Kisi okayo mewin kodi okayin pa le ma peco jobedo aparan.

²⁰To wiripo nyewo okayin pa punde gi mic ma nyathi rombo ma wode. Ka wikinyewo, tur win ŋute. Nyew win okayin mewin.” “Wongoye ŋata wobin ruwaŋan m'ongoye mic.”

²¹ “Winitie gi ndelo aucel ma timo tic mewin, to wikiri witiy i ndelo mar'abirio, kada i ndir ma cwoyo gi ndir ma kec.”

²² “Kur win kalima ma keco ka wicako keco cemo marapena ma ŋano mewin kodi kalima ma cwir ka oro rumo.”

²³“Didek kisi oro cwo mewin je joripo laman, Rwoth, Were pa Isiraili.

²⁴K'atieko riemo woko nonin no ruwaŋ win t'ayawo kew mewin, ongoye ŋata latemo mako piny mewin i ndir ma kalima adek no.”

²⁵ “Wikiri wimiy mugat m'otimi gi thow ka wimiyan cowirok mar'ogwaŋ. Wikiri wikan kiri yawere odikin adec moro je mar'ogwaŋ ma withumo i kalima ma Kadho.”

²⁶ “Kisi oro keli win ranyak marapena ma ŋano i Ot pa Rwoth.” “Wikiri witedi nyathi rombo kosa nyathi diel i cak pa min.”

²⁷Rwoth owaco ri Musa ni, “Ndiki wac me piny, rupiri obedo i wiwaci me m'atimo cikirok kodin kodi Isiraili.”

²⁸Musa obedo kenyo gi Rwoth ma ndelo piero aŋwen wor g'odieceŋ, ma kicem kosa madhi gimoro. Ondiko i telin wac ma cikirok; Or Apar.

²⁹Munyo Musa oloro wok wi got Sinai munyo otiŋo Or Apar, waŋe oyido menyin rupiri go oyido owok luwo gi Rwoth, to Musa won oyido okuya.

³⁰Aron gi ji je munyo joŋiyo Musa aka joneno waŋ go menyin, jolworo kidho cegin gi go.

³¹To Musa olwoŋo jo, aka Aron gi jotel pa ji jokidho bonge to Musa luwo gi jo.

³²Aka rumacen Joisiraili je jobino cegin to Musa miyo jo cik je ma Rwoth oyido omiyo go wi got Sinai.

³³Munyo Musa otieko luwo gi jo, oumo waŋe gi kitambala.

³⁴Kisi ka Musa okidho i Wema ma Rwoth bed'iye luwo gi Rwoth, kwanyo woko kitambala. Ka go owok, oyido waco ri Joisiraili kisi gima Rwoth omiyo go or ni wowaci,

³⁵aka oyido joneno nike waŋ Musa menyin. Kenyo go oyido dwoko kitambala cuka hongo ma go okidhi luwo gi Rwoth.