Read dhopadhola Wok 36 Bible Online

Wok 36 - dhopadhola bible

Wok 36

¹“Bezalel, Oholiab, kodi jotic man ma Rwoth omiyo jo ndijo kodi niaŋ, ma joŋeyo nger ma timo kisi gima mitere ma geto Wema Maleŋ, jowotimi paka Rwoth owodho or.”

²Musa olwoŋo Bezalel, Oholiab, kodi cwo man je ma Rwoth oyido omiyo jo nyalo aka m'oyido cuny gin ogudo jo, aka owaco rijo cako tic.

³Jojolo wok bongi Musa mic je ma Joisiraili oyido jokelo ma geto Wema Maleŋ. To Joisiraili jomedere kelo ri Musa mic kisi odikin.

⁴Kenyo cwo ma jondijo m'oyido jotimo tic jokidho

⁵aka jowaco ri Musa ni, “Ji jokelo gigipiny kweth maloyo ma mitere ma timo tic ma Rwoth owodho or ni wotim.”

⁶Ameno Musa owodho or i kambi gipi nike wongoye ŋata wokel gimoro man ri Wema Maleŋ, aka ji jok'okelo kendo.

⁷Kole gim'oyido otiek kelo oyido romo cowo tic kiri gidoŋ.

⁸Cwo ma jondijo loyo kwoŋ cwo ma jotimo tic ama jogeto Wema Maleŋ. Jotimo wok kwoŋ adec apar ma nangin mafoth m'okwoy gi yer rombo manyabululu, manyarangi ariŋo, kodi m'obokere kodi cwec ma jobwombi gin.

⁹Kisi adec oyido rom, mita apar g'ario i boro kodi mita ario i laco.

¹⁰Jokwoyo abic kanyacel to jotimo ameno ri abic man bende.

¹¹Joketho kondin ma nanga manyabululu i tok adec ma woko i kisi adec ario m'okwoy kanyacel.

¹²Joketho kondin piero abic i kisi adec m'okwoy kanyacel.

¹³Jotimo siragetere ma zahabu piero abic, ma riwo adec ario m'okwoy kanyacel.

¹⁴Jotimo giumo Wema wok kwoŋ adec apar g'acel ma nanga m'otimi gi yer diel.

¹⁵Jotimo ma jorom, mita apar g'adek i boro kodi mita ario i laco.

¹⁶Jokwoyo abic kanyacel kodi aucel man bende kanyacel.

¹⁷Joketho kondin piero abic i tok adec ma woko ma kisi adec m'okwoy kanyacel.

¹⁸Jotimo siragetere piero abic ma ywel ma riwo adec ario m'okwoy kanyacel ŋey jowobedi acel.

¹⁹Jotimo giumo ario man wok kwoŋ pien wod rombo gi pien diel.

²⁰Jotimo miangin m'otire wok kwoŋ mbawo kasia ri Wema.

²¹Kisi miango oyido romo mita aŋwen i boro kodi inci piero ario g'abirio i laco,

²²kodi akare ario, ŋey miangin wonyali riwo kanyacel. Miangin je oyido jonitie gi akare me.

²³Jotimo miangin piero ario yuthenge ma yupiny

²⁴kodi pende piero aŋwen ma feza m'orwaki i ŋangi jo, pende ario i ŋangi kisi miango ma mako akare ario.

²⁵Jotimo miangin piero ario ri thenge ma yumalo ma Wema

²⁶kodi pende piero aŋwen, ario i ŋangi kisi miango.

²⁷Ri yucen ma Wema, yuwok ceŋ, jotimo miangin aucel

²⁸kodi miangin ario ri kisi sonda.

²⁹Miangin ma kisi sonda me oriw wok piny kiri i wiye. Miangin ma jotimo kisi sonda ario otim jo i nger me.

³⁰Ameno oyido jonitie miangin aboro kodi pende apar g'aucel ma feza, ario i ŋangi kisi miango.

³¹Jotimo yen ariwa apar g'abic wok kwoŋ mbawo kasia, abic ri miangin ma thenge acel ma Wema,

³²abic ri thenge man, kodi abic ri thenge ma yuwok ceŋ yucen.

³³Yath ariwa ma diere mere, m'oketh adec miango, oyare wok i gike acel tundo i gike man.

³⁴Joumo miangin gi zahabu aka jotweyo gi petin ma zahabu mako yen ariwa, ma bende oyido oum gi zahabu.

³⁵Jotimo nanga ma liero gi nanga mafoth, m'okwoy manyabululu, manyarangi ariŋo, kodi yer rombo m'obokere aka jokwoyo gi cwec ma jobwombi gin.

³⁶Jotimo gute aŋwen wok kwoŋ mbawo kasia ma mako nanga ma liero, joumo gi zahabu, aka jotweyo gi siragetere ma zahabu. Kenyo jotimo pende aŋwen ma feza mako gute.

³⁷Ri dhiot ma Wema jotimo nanga ma liero gi nanga mafoth m'okwoy gi yer rombo manyabululu, manyarangi ariŋo kodi m'obokere aka jokwoyo maŋon gi piso.

³⁸Ri nanga ma liero jotimo gute abic m'otwey gi siragetere, joumo wi gin kodi ludhe mere gi zahabu, aka jotimo pende abic ma ywel ri gute.