Read dhopadhola Wok 40 Bible Online

Wok 40 - dhopadhola bible

Wok 40

¹Rwoth owaco ri Musa ni,

²“K'acel i dwe mar'acel kethi Wema Maleŋ wocungi.

³Kethi Kakan ma Cikirok m'otiŋo Or Apar i iye aka ikethi nanga ma liero i nyime.

⁴Keli meza aka ikethi gigipiny mere i iye. Bende keli raŋaw tala aka ikethi talin mere i iye.

⁵Kethi migam ma zahabu ma waŋo buban ruwaŋ Kakan ma Cikirok aka ilieri nanga ma liero i dhiot ma Wema.

⁶Kethi migam ma waŋo mic ruwaŋ Wema.

⁷Kethi kalaya ma lwoki i dier Wema kodi migam aka ipoŋ'iye pi.

⁸Kethi diedipo ma thoko aka ilieri nanga ma liero i waŋkac mere.”

⁹“Kenyo kethi gicen Wema gi gigipiny mere gi wiro gi mo, aka labedo maleŋ.

¹⁰Ma luwo, kethi gicen migam gi gigipiny mere je gi wiro gi mo, aka labedo maleŋ kicutho.

¹¹Bende kethi gicen kalaya ma lwok gi pende je i nger acel.”

¹²“Keli Aron gi wote i dhiot ma Wema, aka iwaci rijo jowolwokere gi pi.

¹³Ruk Aron i ruk pa jocway ri Were i wi migam, wir go gi mo, aka i nger acel ikethi go gicen, ŋey wonyali tiyo ran paka jacway ri Were i wi migam.

¹⁴Keli wote bende aka iruki rijo satere.

¹⁵Kenyo wir jo gi mo, paka iwiro bajo, ŋey jowotiy ran paka jocway ri Were i wi migam. Wiro jo me bino loko jo jocway ri Were i wi migam ma hongo je ma bino.”

¹⁶Ameno Musa otimo kisi gimoro je paka Rwoth omiyo go or.

¹⁷Aka k'acel i dwe mar'acel ma oro mar'ario rumacen ma jotieko eye i Misir, okethi Wema Maleŋ to cungo.

¹⁸Musa oketho pende je piny, oketho miangin mere cungo, oriwo yen ariwa mere to ketho asu mere.

¹⁹Oyaro giumo i wi Wema to ketho giumo ma woko, paka Rwoth oyido owodho or.

²⁰Kenyo okwanyo telin mapando ario aka oketho i Kakan ma Cikirok. Oketho gute i petin ma Kakan ma Cikirok aka oketho giumo i wiye.

²¹Kenyo Musa oketho Kakan ma Cikirok i Wema to liero nanga ma liero malo. I nger me ogeŋo Kakan ma Cikirok paka Rwoth oyido owodho or.

²²Musa oketho meza i Wema, yuthenge ma yumalo woko ma nanga ma liero,

²³aka oketh'iye mugat m'imiyo Rwoth, paka Rwoth oyido owodho or.

²⁴Oketho raŋaw tala i Wema, yuthenge ma yupiny tirtir gi meza,

²⁵aka kenyo ruwaŋ Rwoth ocwinyo talin paka Rwoth oyido owodho or.

²⁶Musa oketho migam ma zahabu i Wema ruwaŋ nanga ma liero,

²⁷aka owaŋ'iye buban maŋwe kur paka Rwoth oyido owodho or.

²⁸Oketho nanga ma liero i dhiot ma Wema,

²⁹aka kenyo ruwaŋ nanga ma liero oketho migam ma waŋo mic. Musa omiyo cowirok awaŋa paka Rwoth oyido owodho or.

³⁰Musa oketho kalaya ma lwok i dier Wema gi migam aka opoŋo gi pi.

³¹Musa, Aron gi wot Aron jolwoko cingi gin gi tiendi gin kenyo

³²kisi ka jodonjo i Wema kosa i migam paka Rwoth oyido owodho or.

³³Musa oketho diedipo thoko Wema kodi migam aka oliero nanga ma liero i waŋkac ma diedipo. Ameno ocowo tic je.

³⁴Kenyo pondeponde oumo Wema aka dwoŋ pa Rwoth opoŋ i Wema.

³⁵Ro gime Musa k'onyalo donjo i Wema.

³⁶I woth pajo je Joisiraili oyido jokodere i kabedo man nyaka ka pondeponde oay wok kwoŋ Wema.

³⁷To kafodi pondeponde koay, jok'okodo kambi pajo.

³⁸Kole i woth pajo je oyido joneno pondeponde pa Rwoth i wi Wema odieceŋ aka wor mac maliel i wiye.