Read dhopadhola Wok 5 Bible Online

Wok 5 - dhopadhola bible

Wok 5

¹Rumacen Musa gi Aron jokidho bongi Farawo aka jowaco ni, “Rwoth, Were pa Isiraili waco ni, ‘Weyi ji paran jowokadhi, ŋey jowotimi ran kalima i thim.’ ”

²To Farawo penjo ni, “Rwoth a ŋa ma ripo winjo dwonde t'aweyo Isiraili kadho? Akuya Rwoth, aka kiri akibino weyo Joisiraili jowokadhi.”

³Musa gi Aron jodwoko ni, “Were pa Joebulaniya oromo gi wan, weyi wakadhi, wakwayin, wawothi ma ndelo adek kadho i thim miyo cowirok ri Rwoth, Were mawan. Ka wakikadho, go bino neko wan gi two nundu kosa lweny.”

⁴To kere ma Misir owaco rijo ni, “Musa gi Aron, raŋo wikwanyo ji wok i tic pajo? Dwoki win ŋecin no i tic.

⁵Win wilokere madit loyo Jomisir. Aka onyo pama wimito weyo tic.”

⁶Ndelo no won Farawo owaco ri jorom jo timo tic matek kodi jotel pajo ma Joisiraili ni,

⁷“Weyi win miyo ji gigoyo matafal. Miy win jo wegi jokadhi jowocoki.

⁸To fodi wiripo miyo jo goyo welo matafal paka con mere, wikiri widwoki cen; kole jongoye gi tic ma romo, aka am'omiyo jokwayan ni awey jokadhi jowomiy cowirok ri Were pajo.

⁹Miy win jome tic matek loyo aka wikiri wiyey jo ywomirok, ŋey kiri jowowinji wac twodo.”

¹⁰Ameno jorom jo timo tic matek kodi jotel pa Joisiraili jokadho woko to jowaco ri Joisiraili ni, “Farawo owaco nike wakiri wamiy win gigoyo matafal.

¹¹Win wegi kadhi wirangi kama winyalo nwaŋ'iye, to fodi wiripo goyo welo matafal paka con.”

¹²Ameno ji joywore i Misir gipi rango gigoyo matafal.

¹³Jorom jo timo tic matek jobedo kanyo joromo jo goyo welo matafal acel kisi ndelo paka munyo oyido imiyo jo gigoyo.

¹⁴Jomisir ma jorom jo timo tic matek jogoyo Joisiraili ma jotel pa wadi jo. Jopenjo jo ni, “Raŋo wikigoy welo matafal paka oyido con?”

¹⁵Kenyo jotel ma Joisiraili jokidho bongi Farawo kigeŋisa, “Raŋo itimo gime riwan jadwoŋ?

¹⁶Kimiy wan gigoyo matafal, to fodi wimiyo wan or goyo matafal! Aka onyo igoyo wan. Ji perin ama jokom.”

¹⁷To Farawo dwoko ni, “Winyap aka wikimiti tic aka am'omiyo wikwayan weyo win wikadhi wimiy Rwoth cowirok.

¹⁸Onyo gik win tic, rupiri kilamiyo win gigoyo matafal, to fodi wiripo goyo welo macon.”

¹⁹Jotel ma Joisiraili joneno ni oyido jonitie i teko munyo owaci rijo nike joripo goyo welo matafal macon kisi ndelo.

²⁰Joromo gi Musa kodi Aron m'oyido jokuro jo, paka jowok bongi Farawo

²¹aka jowaco rijo ni, “Rwoth oneno gima witimo aka bino miyo win gir'acula ro miyo Farawo dak wan. Wimiyo jo bedo gi atoŋa ma neko wan.”

²²Kenyo Musa owire bongi Rwoth kendo to waco ni, “A Rwoth, raŋo itimo raco ri ji me? Raŋo ioran ka?

²³Kole wok cuka abin bongi Farawo luwo i nyingin, otero jo gi gero, aka ongoye gim'itieko timo ma konyo jo.”