Read dhopadhola Yobu 1 Bible Online

Yobu 1 - dhopadhola bible

Yobu 1

¹Cango obedo jacwo moro i lowo ma Uz m'ilwoŋo ni Yobu.

²Go oyido nitie gi wote abirio gi nyike adek.

³Go oyido nitie gi rombo 7,000 ŋamin 3,000 dhok 1,000 punde 500 kodi ŋecin kweth. Go am'oyido obedo jaŋaŋo loyo ji je ma yuwok ceŋ.

⁴Wot Yobu oyido jotimo kalima i weso i ot pa kisi dhano, ma joman oyido jokidho i ot pa ŋata timo kalima, aka oyido jolwoŋo nyimin jo.

⁵Kisi k'acel otimo kalima, Yobu oyido cew odikin to miyo cowirok awaŋa cungo kwoŋ welo pajo ma lonyo jo. Ato Yobu oyido waco ni, “Poyi nyithindho paran jotimo reco, to jokwoŋo Were i cuny jo.” Me gima Yobu otimo noknok.

⁶Ndelo acel, jomalaika jobino ruwaŋ Rwoth, aka jakwor Sitan bende obino i dier jo.

⁷Rwoth openjo Sitan ni, “Iwok yukune?” Sitan odwoko ni, “Awok thembo ka gi kaca, kilera i piny.”

⁸Rwoth openjo jakwor Sitan ni, “Iliewo ye ŋeca paran Yobu? Ongoye ŋata cale gi go i piny. Go ongoye g'apuse aka obedo jacwo m'otire ma lworo Were aka kitim reco.”

⁹Sitan odwoko Rwoth ni, “Kosa Yobu lworo Were manono?

¹⁰Kole itieko geto cel thoko go gi peco pere kodi kisi gima go nitie gine i kisi thenge. Itieko miyo tic ma cinge silwany, aka lim pere onyay i piny.

¹¹To tel nyaka cingin, aka igey gima go nitie gine je, Yobu lakwoŋin ruwaŋin.”

¹²Rwoth owaco ri jakwor Sitan ni, “Meno ber, kisi gima go nitie gine je nitie i cingin, to nyaka ikir'itel cingin geyo go!” Ameno Sitan oeye woko ruwaŋ Rwoth.

¹³Ndelo acel, munyo nyithindho pa Yobu jotimo kalima i ot p'omin jo madwoŋ, oyido jocemo aka jomedho.

¹⁴Jamikwenda obino to waco ri Yobu ni, “Megikwe oyido jofuro aka punde bende jocemo gi thenge.

¹⁵Kenyo Josabin jopodho kwoŋ jo to jokadho gi jo. Joneko ŋecin perin je g'abor, aka an kendan aŋat'akwale waco rin.”

¹⁶Mafodi jamikwenda no luwo, ŋeca man obino to waco ri Yobu ni, “Mac pa Were opodho wok i polo to waŋo woko rombo gi ŋecin, aka oreyo woko joje. An kendan aŋat'akwale waco rin.”

¹⁷Mafodi jamikwenda no luwo, ŋeca man obino to waco ri Yobu ni, “Jobabilon jobino i kitipin adek, aka jonyaga ŋamin to joneko ŋecin g'abor. An kendan aŋat'akwale waco rin.”

¹⁸Mafodi jamikwenda no luwo, ŋeca man obino to waco ri Yobu ni, “Nyithindho perin oyido jocemo aka jomadho vini i ot p'okayo perin,

¹⁹koyo madwoŋ okudho wok i thim abwap, to redho sondin aŋwen ma ot, aka opodho kwoŋ jo jotho. An kendan aŋat'akwale waco rin.”

²⁰Kenyo Yobu oay, oyeco woko kanzu pere, olielo ye wiye to fodere piny to lamo.

²¹Go owaco ni, “Cango awok i iy mama ma bu gimoro, aka alatho ma bu gimoro. Rwoth omiyan aka kendo omayan; nyingi Rwoth wopak.”

²²Makada nende gime je otimere, Yobu k'otimo reco aka go k'opusa Were.