Read dhopadhola Yobu 11 Bible Online

Yobu 11 - dhopadhola bible

Yobu 11

¹Kenyo Zofar ma wok i Namath odwoko ni,

²Wac kweth okadhi ma k'odwoki? Jawaci kweth owaci ni go otire?

³Kiwerawera perin gi wac lamiyo joman liŋ, aka ka iŋalo wac, ongoye ŋata lasewo wiyin?

⁴Iwaco ni fonji perin olony, aka ilony ruwaŋ Were.

⁵To wi, ka bedi Were oyido nyalo luwo, to ŋamo dhoke rin,

⁶dinyo go owaco rin nyaliŋliŋ ma rieko. Kole rieko nenere i nger kweth. Ŋey ni Were miyin gir'acula ma kirom gi reco perin.

⁷Inyalo dwaro kwoŋ gigipiny pa Were t'inwaŋo? Inyalo ŋeyo gike pa Jameni Je?

⁸Kole bor yombo polo; t'ilatimo aŋo? Aka luth loyo piny pa jom'otho; t'inoŋey aŋo?

⁹Dwoŋo mere kalo piny, aka laco mere kalo nam.

¹⁰Ka Were omakin, to tweyin, aka olwoŋi ji winjo banja, ŋa manyalo cero go?

¹¹Kole go oŋeyo ji ma bukony, ka go oneno kidakana, go k'odew kwoŋe?

¹²To jamiŋo lacako niaŋ, ka punda onywolo dhano.

¹³K'itiro cunyin, ilayaro cingin rango go.

¹⁴K'itieko timo kidakana gi cingin, kethi gi bor, aka ikir'iwey tiro wongoye i wemin perin.

¹⁵Kenyo nyaka ilatiŋo waŋin malo m'ongoye apuse, aka ilaridhere m'ocwiny m'ongoye lworo.

¹⁶Wiyin lawil gi teko perin, aka ik'opoy paka pi m'otieko mol.

¹⁷Kwo perin labedo maler paka odieceŋ, aka mudho mere lacale odikin.

¹⁸Ilabedo m'ocwiny kwoŋbedo geno nitie, aka ilakikwonga in, t'iywomere i siem.

¹⁹Ilanindo piny, aka ongoye ŋata labwokin, ji kweth jolakwayin kony.

²⁰To waŋ jokidakana lamore, jolangoye gi nger ma kwalok, aka geno pajo labedo kuro tho.