Read dhopadhola Yobu 17 Bible Online

Yobu 17 - dhopadhola bible

Yobu 17

¹Cunyan obwok, aka ndelo paran orumo, kole bur ma yik kuran.

²Adieri joŋalok jothokan, aka aneno jo gi waŋan ka jokwinyan.

³Mondo yere gi gim'awaco, awi Were, ongoye dhano man ma layere kodan.

⁴Itieko cego paro pajo niaŋ, riameno ikilayeyo jowoloyan.

⁵Jono ma jokwedere kwoŋ merin pajo ro cul, nyithindho pajo jolacandere ri gino.

⁶Atieko lokere ri ji ageca awaca, aka ji joŋulere ruwaŋan.

⁷Waŋan otieko cor ro rem, aka delkwoŋan mok paka tipo.

⁸Ji ma jotimo gim'otire jodhier ro gime, aka joje jowaco ni akuya Were.

⁹Kucel ŋata timo gim'otire kiladhiere, aka ŋata cinge olony lamedo bedo matek.

¹⁰To win, dwoki win, wijoje, aka akilanwaŋo i dier win ŋata nitie gi rieko.

¹¹Ndelo paran orumo, aka can paran onyekere woko, kwoŋ mito ma cunyan.

¹²Jolwoŋo wor ni odieceŋ, aka jowaco ni lero both cal mudho.

¹³K'anonen piny pa jom'otho paka ot paran, k'anopedhi kanindo paran i mudho,

¹⁴k'anolwoŋ bur ni, baba, kodi kudin ni mama kosa nyamin an,

¹⁵anobedi gi geno, kosa nitie ŋat'omiyan geno?

¹⁶Geno paran kiladonjo kodan i piny pa jom'otho? Wakilakadho piny kanyacel i fukefuke?