Read dhopadhola Yobu 19 Bible Online

Yobu 19 - dhopadhola bible

Yobu 19

¹Kenyo Yobu odwoko ni,

²Wilamiyan litho kiri keraŋo? Aka wilaturan gi wac mewin?

³Sawa je wiyetan, aka wickwot kimaki win timo ran marac.

⁴To makada nende oyido bedi ni adieri atimo reco, meno mako kwoŋan won.

⁵Adieri witieko kwoto ran, aka wiloko teko paran gi piem mewin.

⁶Onyo ŋey win ni Were am'otieko miyan akom, aka otweyan i katimba pere.

⁷Makada nende aywak ni, “Akaka.” Ongoye ŋata dwokan, aka ongoye ŋata winjo ywak paran ri tiro.

⁸Were otieko geŋo royo paran, aka akinyali luwo, go oketho mudho i yo paran.

⁹Go okwanyo woko lim paran, aka oreyo woko dwoŋ paran.

¹⁰Go turan woko i kisi thenge, aka arumo, go otieko fudho woko geno paran paka ifudho yath.

¹¹Keme pere oliel kwoŋan, aka go teran paka jakwor pere.

¹²Jolweny pere jobino kanyacel, aka jokaran, joketho kambi pajo thoko wema paran.

¹³Were omiyo jothuwan won kwedirok kwoŋan, aka onyo alokere japath ri ji ma joŋeyan.

¹⁴Merin paran gi wade paran joredhan,

¹⁵wendo ma jobino i ot paran wi jo owil kodan, onyo alokere japath aka jakicar ruwaŋ ŋecin paran ma mon.

¹⁶Alwoŋo ŋeca paran, aka go kiye ran, an aŋat'aywakere rigo kendo.

¹⁷Dhako paran kinyal ciro ŋwece paran, wade paran jokinyal corok cegin bongan.

¹⁸Nyithindho mathindho jocayan, aka jonyeran ka jonenan.

¹⁹Merin paran ma kacunyan jodakan, aka jono m'amaro jowire kwoŋan.

²⁰Cokin paran omoko i pien gi delkwoŋan, aka joŋenyere woko paka lakan.

²¹Maki win kodan wor, maki ran win wor, awi merin paran, kole cingi Were otieko geyan.

²²Raŋo wirieman paka Were rieman, wikiyeŋ gi litho paran?

²³Kabedi dhano oyido nyalo ndiko wac paran, aka t'ikano i kitawo!

²⁴Kosa ka bedi oyido inyalo goro gi kalam ma cuma i tele, t'indiko ma kinyal rere kendo!

²⁵Kole aŋeyo ni Jaboth paran kwo, aka ni rumacen go lacungo ran i piny.

²⁶Ka two otieko camo pien delkwoŋan, kafodi anitie i del me, alaneno Were.

²⁷Go, ma an won alaneno, alaneno go gi waŋan won, makiweno ŋatiman. Adundo paran gore,

²⁸kwoŋbedo wiwaco ni, wanocandi go nedi, wirango tiendi wac kwoŋan.

²⁹To onyo, bedi win gibwok ri abor, abor ma kelo keme pa Were kwoŋ reco, ŋey wiŋey ni nitie ŋata thumo banja.