Read dhopadhola Yobu 20 Bible Online

Yobu 20 - dhopadhola bible

Yobu 20

¹Kenyo Zofar ma wok i piny Namath odwoko ama,

²Paro paran diyan m'akinyal liŋ, kwoŋbedo akinyali bedo moth.

³Gim'iwaco obedo yet, t'aŋeyo nger ma dwokin'iye.

⁴Fodi ikuya gime wok cango, wok cuka cwey dhano i piny,

⁵ni ongoye jakidakana m'otieko kwo hongo malac, aka ni kisangala pa ji ma bu Were bedo macek?

⁶Makada nende jodongi madwoŋ, tundo i polo, aka wic jo otele geyo pondeponde,

⁷jolarere kicutho paka ceth pajo, aka jono m'oyido joŋeyo jo jolapenjo ni, “Nikune jo?”

⁸Jolarwenyo paka lek, aka k'onwaŋi jo, aka ilariemo woko jo paka menyirok ma wor.

⁹Ji m'oyido joneno jo, jokilaneno jo kendo, aka jolarwenyo i kabedo m'oyido jokw'iye.

¹⁰Nyithindho pajo joladwoko ri jocandi, lim ma jokwalo gi cingi jo.

¹¹Delkwoŋ jo oyido foth aka tek, to jolalokere fukefuke.

¹²Makada nende kidakana mit i dhok jo, aka jokudo i dandi jo,

¹³makada nende jokinyal weyo, aka jomedo kano i dhok jo,

¹⁴cemo pajo lokere makec i iy gin, makec paka kwir thwol i iy jo.

¹⁵Joŋoko lim m'oyido jokwalo, Were fudho woko wok i iy jo.

¹⁶Jolamwonyo kwir malasaŋ, aka laneko jo paka thwol toŋo jo.

¹⁷Jokilakwo neno malawa, waŋ pi ma mol gi mo kic kodi cak.

¹⁸Jolapoko kisi gima jotieko tiyo rigo, aka jokilawinjo cwe ma lim pajo.

¹⁹Kole jotieko diyo to jojwango jocandi, jotero udi ma jok'ogeto.

²⁰Iy jo kipoŋi gi ma romo, aka woro kimiy jo rem gimoro.

²¹Ka jocemo, ongoye gima doŋ, riameno lim pajo rumo woko.

²²Ka jonitie gi ma romo, jobedo i litho, aka peko ma rem je podho kwoŋ jo.

²³Ma poŋo iy gin, Were ladhiro nge pere mager i iy jo, aka lacwe kwoŋ jo paka cemo pajo.

²⁴Jolaringo kwoŋ gilweny ma nyweny, aka asere ma ywel lacelo jo.

²⁵Aserin celo delkwoŋ jo aka yure woko, lewe ma pilin wok ikedhino pajo, aka jokirin.

²⁶Kisi gima jotieko kano larere woko, mac ma dhano ama k'ocwinyo lawaŋo jo, aka lareyo woko gim'odoŋ i wema pajo.

²⁷Polo lathango reco pajo, aka piny lamonjo jo.

²⁸Ilareyo woko lim pajo je, i mikula ma keme pa Were.

²⁹Me obedo gir'acula pa jokidakana, me obedo gike pajo ma Were owodho or kwoŋe.