Read dhopadhola Yobu 22 Bible Online

Yobu 22 - dhopadhola bible

Yobu 22

¹Kenyo Elifaz ma wok i Teman odwoko ama,

²Dhano bende nitie gi cwe ri Were? Adieri ka dhano riek meno cwe pere won.

³Timo gim'otire perin sangala Jameni Je? Nitie gima Were limo ka yo perin ongoy'iye apuse?

⁴Were bwokin aka temin, kwoŋbedo ilworo go?

⁵Be, obedo kwoŋbedo kidakana perin dwoŋ, aka reco perin thoth.

⁶Itieko mako gigipiny pa ji m'ongoye atoŋa, aka imayo jo nangin to jodoŋ kinyoro.

⁷Ikwero miyo joma riyo neko pi, aka ithwono joma kec neko cemo.

⁸I oro dwoŋ perin gi meni perin, ma mayo ji lowo je.

⁹Itieko riemo woko mon tho gi cingi jo nono, aka itieko kinyaga t'icando nyithindho kic.

¹⁰Riameno bwo othokin, aka lworo poŋ kwoŋin abwap.

¹¹Mudho oumin m'ikinyal ŋiyo, aka mikula umin.

¹²Were bedo malo i polo, aka go neno micalin malo, makada nende joŋawere.

¹³Riameno ipenjo, aŋo ma Were oŋeyo? Go nyalo thumo riwan banja ma pondeponde oumo go?

¹⁴Pondeponde umo go, ma go kinyal neno, aka go wotho thoko polo.

¹⁵Ilamedere woth i yo macon, ma jokidakana jowoth'iye?

¹⁶Jotho mafodi hongo pajo k'otundo, aka mikula oreyo woko jo.

¹⁷Jowaco ri Were ni, “Weyere gi wan. Aŋo ma Jameni Je nyalo timo riwan?”

¹⁸Kucel Were opoŋo udi pajo gi gigipiny maber, to akiniaŋ can pa jokidakana.

¹⁹Ji ma jotimo gim'otire gi ji ma bubanja jonyero, ka joneno imiyo jokidakana gir'acula.

²⁰Kole jowaco ni, “Adieri jokwor mawan jotho, aka mac oreyo woko gima joweyo.”

²¹Yere gi Were Yobu, aka ibedi i siem gi go. I nger me ilalimo bero.

²²Yey fonji ma wok i dhok go, aka kur wac pere i cunyin.

²³K'igik bongi Jameni Je, t'itimo gim'otire peco perin, go ladwokin.

²⁴K'itero zahabu paka fukefuke, kodi zahabu ma Ofir paka telin mager,

²⁵t'itero Jameni Je paka zahabu perin, i feza perin ma welo,

²⁶kenyo ilaketho geno i Were, aka go labedo kisangala perin.

²⁷Ilakwayo Were, to go winjin, aka ilakuro cikirok perin.

²⁸Ilatimo gimoro, aka lacowere rin maber, aka yo perin labedo maler.

²⁹Were mwolo jonoro, aka go tiŋo malo ji mamwol.

³⁰Go labothin k'ingoye gi banja, ka gim'itimo otire.