Read dhopadhola Yobu 23 Bible Online

Yobu 23 - dhopadhola bible

Yobu 23

¹Kenyo Yobu odwoko ama,

²Konon bende kigeŋisa paran kec, cingi go fodi pek kwoŋan, makada nende auco.

³Kabedi oyido aŋeyo kam'anyalo nwaŋ'iye Were, ŋey anyal kadho kama go bed'iye.

⁴Dinyo aosa ruwaŋ go, t'awodho piem paran.

⁵Dinyo aŋeyo radwok pere, t'aniaŋ gima go d'owaci.

⁶Were oyido nyalo kiosa kodan i meni pere madwoŋ? Be, to dinyo go winjan, k'aluwo.

⁷Koro ŋata timo gim'otire dinyal pido gi Were, aka dinyo go owaco ni an abu banja.

⁸K'akadho malo, Were ongoye kenyo, k'agiki acen, akinyali niaŋ go,

⁹k'akidho racam go pondo, aka akinen go, k'awire racuc, je akinen go.

¹⁰To go oŋeyo woth paran je, ka go oteman, lanwaŋo ni acil paka zahabu.

¹¹Tiendan kirway i yo pere, atieko kuro yo pere aka akiwire i thenge.

¹²Or pere kingoye i dhokan, aka atieko tero wac ma wok i dhok go i cunyan.

¹³To go won cowere, ongoye ŋata nyalo wiro paro pere. Gima go mito ama timo.

¹⁴Go ketho i kare gima go ocano ran, aka nger gigipiny no thoth i paro pere.

¹⁵Riameno abwok ruwaŋ go, k'aparo kwoŋe, apoŋ gi lworo rigo.

¹⁶Were otieko miyo cunyan podho, Jameni Je otieko bwokan.

¹⁷Kabedi oyido anyalo rwenyo i mudho, dinyo mudho omiyo waŋan ocore.