Read dhopadhola Yobu 27 Bible Online

Yobu 27 - dhopadhola bible

Yobu 27

¹Yobu kendo ocako luwo aka owaco ama,

²Paka Were kwo, go m'othwonan tiro, Jameni Je, ma miyo kwo paran litho,

³tekin anitie gi kwo, aka fodi aywe luya pa Were,

⁴akibino luwo raco gi dhokan, aka lewan kilatwodo.

⁵Wobedi bor kodan waco ni itire i gim'iwaco, akibino weyo timo adieri cuka anotho.

⁶Akilaweyo waco ni atire, cunyan tek ma kiyengere.

⁷Weyi jokwor paran jowocal jokidakana, aka weyi ji ma jokiyere kodan jowocal ji ma butiro.

⁸Geno aŋo manitie ri ji ma bu Were ka Were oneko jo, kosa ka Were omayo jo kwo?

⁹Were owinji ywak pajo, ka teko opodho kwoŋ jo?

¹⁰Josangala gi Jameni Je, aka jokway go i hongo je?

¹¹Alafonjin kwoŋ cingi Were, akibino muŋo gima nitie bongi Jameni Je.

¹²Wijoje witieko neno, onyo raŋo wiriwere luwo koyo?

¹³Me obedo adec pa jokidakana wok bongi Were, gi gir'acula ma jomaker jolimo wok bongi Jameni Je.

¹⁴Ka jonywol nyithindho kweth, ilaneko jo g'abor, aka nyikway jo jongoye gi cemo ma romo.

¹⁵Jono ma joboth jotho gi two nundu, aka mon tho pajo jokiywak.

¹⁶Makada nende jodhure gi feza paka fukefuke, to jopanga nangin paka lowo,

¹⁷to ŋataber ama laruko, aka ŋata timo adieri ama latero feza pere.

¹⁸Jogeto udi pajo paka od winyo, paka kayindi ma ŋeca ogeto ma kuro ndelo vini.

¹⁹Jodonjo i kanindo gi lim, to meno bedo macowe, kani joyawo waŋ gin, ongoye lim ma jonwaŋi.

²⁰Teko karo jo paka mikula, aka asur tiŋo jo wor.

²¹Koyo ma yuwok ceŋ tiŋo jo aka jongoye, yweyo woko jo wok i kabedo pajo.

²²Koyo wito jo m'ongoye wor, aka jodwire kwoŋe.

²³Koyo pathere kwoŋ jo, aka lwiyo kwoŋ jo wok i kabedo mere.