Read dhopadhola Yobu 29 Bible Online

Yobu 29 - dhopadhola bible

Yobu 29

¹Yobu ocako luwo kendo ka waco ni,

²Kabedi kwo paran nyalo gik nyacon, paka i hongo ma Were oyido gwok'iye kwo paran.

³I hongo no Were oyido bedo kodan noknok, aka gi lero pere awotho i mudho.

⁴I hongo no oyido gigipiny kadho ran maber, aka mere paran gi Were ogwoko peco paran.

⁵Jameni Je oyido nitie kodan, aka nyithindho paran je jothokan.

⁶I hongo no oyido athothi gi cak, aka mo kweth onyule ran wok i tele.

⁷Kisi k'akidho i waŋkac ma tindi madwoŋ, t'abedo kam'othangere,

⁸yac oyido jonenan to jocore gicen, aka jom'otegino joay to jocungo ran.

⁹Jotel pa ji oyido joliŋ luwo, aka joumo dhok gin gi cingi jo.

¹⁰Jodhum joliŋ nisi, aka lew gin moko i dandi jo.

¹¹Kisi ŋat'owinjan aluwo, olwoŋan ni jasilwany, aka kisi ŋat'onenan, oluwo kwoŋan.

¹²Me kwoŋbedo akonyo kisi jacandi, m'oywaki ri kony, aka akonyo nyithindho kic m'oyido jongoye gi kony.

¹³Ji m'oyido jocegin rere woko jokwayo ran silwany, aka amiyo cuny citho wero ri kisangala.

¹⁴Atimo gim'otire, aka tiro oyido obedo kanzu paran gi junga paran.

¹⁵An oyido abedo waŋ joma waŋ gin otho, gi tiendi jor'aŋolo.

¹⁶An oyido abedo ba jocandi, aka akonyo jokicar i hongo ma teko.

¹⁷Aturo woko dingi jomaker, aka abotho ji ma jodiyo.

¹⁸Kenyo t'abedo gi paro ni, “Alatho gi peco paran kama yom, aka ndelo paran labedo mathoth paka kwoyo.

¹⁹An oyido acalo yath ma pi kicwiy i fuc mere, ma jange mere thoyo kithw'iye.

²⁰Dwoŋ paran k'oweyan, aka meni k'orumo i cingan paka meni mar'asere.

²¹Ji jokuro winjan, k'aluwo, aka jobedo liŋ, k'amiyo rieko.

²²K'atieko luwo, doko jokiluwi rumacen, aka wac paran okweyo jo paka thoyo.

²³Jokuran paka jokuro koth, aka joŋamo dhok jo ran paka ri koth ma cwir.

²⁴Amiyo jo nyero ka jongoye gi yeyo, aka waŋan ma dikisangala omedo jo meni.

²⁵Abedo jatel pajo, aka anyutho jo yo, t'atelo jo paka kere telo jolweny pere, ayomo cuny jo paka ŋata yomo cuny joywak.”