Read dhopadhola Yobu 35 Bible Online

Yobu 35 - dhopadhola bible

Yobu 35

¹Elihu omedere luwo ka waco ama,

²Yobu, iparo ni itire, waco ni itire ruwaŋ Were?

³K'ipenjere ni, anitie gi kony aŋo, kosa ni aberi nedi loyo ka nende atim reco?

⁴Aladwokin gi wac, kanyacel gi merin perin.

⁵Ŋiy win polo aka winen, kaŋasa win pondeponde, joŋawere swa loyo win.

⁶K'itieko timo reco, meno mako kwoŋ go? K'itimo gim'okom dikweth, litho go?

⁷K'itimo gim'otire, ikonyo Were? Aŋo ma Were limo wok i cingin?

⁸Kidakana perin miyo joman candirok paka in, to k'itimo gim'otire, konyo jo.

⁹Ka ji jonitie iy'adica mathoth, joywak ri kony, jolwoŋo dhano wobothi jo wok i cingi jomeni.

¹⁰To ongoye kwoŋ jo ma rangi Were, jacwec pajo, ma miyo geno wor.

¹¹Go ma fonjo wan loyo ogwaŋe ma piny, aka miyo wan bedo mariek loyo winyin ma koyo.

¹²Kenyo joywak, to go kidwoki, kwoŋbedo noro pa jokidakana.

¹³Adieri Were kiwinji ywak ma rendirok, aka Jameni Je kidew kwoŋe.

¹⁴Adieri ilawaco ni Were kinen, to kur moth, kiosa perin nitie ruwaŋ go.

¹⁵Iparo ni Were i nge pere kimiy gir'acula, aka kidew kwoŋ gimarac.

¹⁶Yobu goyo dhoke nono, go medo wac kweth m'okuya gima waco.