Read dhopadhola Yobu 37 Bible Online

Yobu 37 - dhopadhola bible

Yobu 37

¹Adieri an bende mor pa koth miyan kirin, aka dhokan ŋamere.

²Winji, winji win mor ma dwondi go, kodi derino ma wok i dhok go.

³Go gonyo i pendi polo gibe, aka miyo lithkoth pilin i kisi gike ma piny.

⁴Rumacen dwondi go mor, mor ma dwondi go ma dimeni, aka lithkoth pilin ka dwondi go mor.

⁵Dwondi Were mor ma gir'aura, aka go timo gigipiny madongo ma wakinyali niaŋ.

⁶Kole Were wodho or, aka pe cwe i piny, aka koth cwe, koth mapek,

⁷aka cero ji tic acingi, ŋey kisi dhano ma go ocweyo woŋey tic pere.

⁸Ogwaŋe jokidho i od gin, aka jodoŋ'iye.

⁹Asur wok i diŋ mere, aka ŋico wok i koyo ma kudho.

¹⁰Ywe pa Were ŋico pi, aka miyo pi makere matek.

¹¹Go ŋico pondeponde mapek, aka lithkoth pilin wok i pondeponde.

¹²Jowire thoko kisi thenge, timo kisi gima Were wodho or rijo kwoŋe, kisi kamoro i piny.

¹³Were dhiro koth dhieko piny, go nyalo dhiro ma miyo wan gir'acula, kosa ma nyutho wan wor pere.

¹⁴Awinji gime Yobu, kutho liŋ aka ipar kwoŋ gir'aura ma Were timo.

¹⁵Iŋeyo nger ma Were wodho or kwoŋ jo, aka miyo lithkoth ma pondeponde pere pilin?

¹⁶Iŋeyo nger ma pondeponde mol'iye, tic ma gir'aura pa ŋat'oŋeyo kisi gimoro.

¹⁷Be, inyalo nyaka candirok i lietho, ka koyo ma yupiny otudere i piny.

¹⁸Inyalo yaro pondeponde kanyacel gi go, to bedo matek paka ndewiro ma pilin?

¹⁹Fonji wan gima walawaco ri Were, akinyali kwoŋbedo wanitie i mudho.

²⁰Ripo ni wowaci rigo kutho ni amito luwo? Nitie ŋata nyalo mito ni womwonyi go woko?

²¹Onyo pama ji jokineni lero, ka pilin i pondeponde, ka koyo otieko loko maler.

²²Were bino wok yumalo ma pilin paka zahabu, aka dwoŋ pere thoko wan gi lworo.

²³Meni pa Were dwoŋ ma wakinyali core cegin bonge, go dwoŋ i meni gi tiro, aka go otire noknok.

²⁴Riameno ji jolworo go, aka go kiter gimoro paka ji ma joŋoyo ni joriek.