Read dhopadhola Yobu 39 Bible Online

Yobu 39 - dhopadhola bible

Yobu 39

¹Iŋeyo hongo ma diegi ma gote jonywol'iye? Itieko neno ka amudhe nywol?

²Iŋeyo hongo ma jobed'iye gi iy jo? Iŋeyo hongo ma jonywol'iye?

³Iŋeyo hongo ma jodol'iye piny, to jocolo nyithindhi jo?

⁴Nyithindhi jo jobedo matek, aka jodongo kam'othangere, jokadho yo pajo, aka jokidwoki bongi jo.

⁵Ŋa m'oweyo punde ma thim kadho kama mito? Ŋa m'ogonyo jo to weyo jo kilera?

⁶Amiyo jo thim bedo peco pajo, t'amiyo jo kwo i lowo ma cumbi.

⁷Jobedo bor gi koko ma tindi madwoŋ, ongoye ŋata nyalo mwolo jo ma miyo jo tic.

⁸Josala wi gote kama jocem'iye, kama jorang'iye cemo ma jonyalo camo.

⁹Jow nyalo tic rin? Go nyalo kwo i wer perin?

¹⁰Inyalo tweyo i majogi perin, t'imiyo fur rin?

¹¹Inyalo geno meni mere madwoŋ? Inyalo miyo go tic perin matek?

¹²Inyalo geno ni ladwoko, to kelo ŋano perin wok i kisia?

¹³Bwombi maya kwadhere piyo, to jokinyal ay malo paka mbuluku.

¹⁴Maya weyo tonge i lowo, aka lietho ma lowo ama lietho jo.

¹⁵Go wiye wil ni inyalo nyono gi tiendi jo, kosa ni ogwaŋ madudi nyalo nyono jo.

¹⁶Go tero nyithindhe gi gero paŋini jok'obedo apere, ma go kidew ni litho pere otho nono.

¹⁷Were omiyo wiye owil gi rieko, aka othwono go niaŋ.

¹⁸Ka go oyaro bwombe ŋwec, nyero punde gi jagwey mere.

¹⁹Iŋat'imiyo kayina meni? Iŋat'iruko i dwondi jo meni?

²⁰Iŋat'imiyo jopor paka bonyo, to jobwoko jo gi jero mere?

²¹Jokunyo piny i milelo gi siem, aka joredo i lweny gi meni pajo je.

²²Jokibedi gi lworo kosa jobwoki, aka abor kimiy jo gik acen.

²³Gilweny ma jogwey jo jotiŋo, jorudere aka jopilin i ceŋ.

²⁴Gi gero kodi nge jokunyo piny, aka jokicungi liŋ k'okudhi gwara.

²⁵Kisi k'okudhi gwara jowaco ni, “Aha.” Joŋweyo lweny gi bor, aka jowinjo jomituka jokoko wodho or.

²⁶Obuko yath fonjere ay gi bwombe gi rieko perin, ka joyaro bwombi gin yupiny?

²⁷Iŋat'iwodho or ri ango ay malo, to geto ode kam'oŋawere?

²⁸Ango geto peco pere i gote maboyo, aka loko kisul mere kapondo.

²⁹Gikenyo go kiyo gim'ocam, aka go neno gi bor.

³⁰Ango bedo kama nitie delkwoŋ gim'otho, aka nyithindhe jocwiyo remo.