Read dhopadhola Yobu 40 Bible Online

Yobu 40 - dhopadhola bible

Yobu 40

¹Rwoth owaco ri Yobu ama,

²Jakipusa lapiemo gi Were? Ŋata tiro Were ripo wodwoki go.

³Yobu odwoko Rwoth ama,

⁴An asisiri, anodwokin nedi? Aumo dhokan gi cingan.

⁵Atieko luwo dicel, aka akiladwoko, akilamedo luwo kendo.

⁶Kenyo Rwoth odwoko Yobu wok iy'asur.

⁷Cungi matek paka jacwo, alapenjin, aka iladwokan.

⁸Ilatemo kwero ni atire? Ilawaco ni an akom aka in itire?

⁹Cingin cal gi cingi Were, aka dwondin bende nitie derino paka apere?

¹⁰Nyuthi ni initie gi dwoŋ kodi wor, nyuthi ni idwoŋ aka ji joworin.

¹¹Oy nge perin, ŋiy jono je ma jonoro, aka imwol jo.

¹²Ŋiy kisi janoro aka isew jo, nyon jokidakana kama jocung'iye.

¹³Pan joje i fukefuke, tweyi waŋ jo kanyacel i piny pa jom'otho.

¹⁴Kenyo alapakin, ni cingin maracuc won, am'omiyin loyo.

¹⁵Apa ŋiy ogwaŋ Behemoth ma cal raw, m'acweyo paka in, camo lum paka dhiaŋ.

¹⁶Teko pere nitie i delkwoŋe, aka meni pere nitie i fuc mere.

¹⁷Go ridho yiwe matek paka yath sida, aka fuc ma eme otudere kanyacel.

¹⁸Cokin mere tek paka ywel, aka tiende cal cumin ma nyweny.

¹⁹Go obedo gimarapena ma tim madongo pa Were, aka jacwec pere kende ama nyalo lweny gine g'abor.

²⁰Gote jowega rigo cemo, kama ogwaŋe madudi jotuk'iye.

²¹Go riere i tiendi kudhin, aka pondo i dier midole ma samba.

²²Kudhin kodi osege ma thengi pi, joumo go i tipo.

²³Go kibwoki ka malawa mor, go kilwor ka malawa Yordan kire i waŋe.

²⁴Nitie ŋata nyalo mako go ka neno? Kosa nitie ŋata nyalo cwowo ume i bwo?