Read dhopadhola Yobu 41 Bible Online

Yobu 41 - dhopadhola bible

Yobu 41

¹Inyalo kitoga woko ogwaŋ Leviathan gi siraget ma mako rec? Inyalo tweyo lewe piny g'adasa?

²Inyalo tweyo thol i ume? Inyalo cwowo dinge gi siraget?

³Onyali ywak rin iwey wokadhi, kosa luwo kodin gi wac mamit?

⁴Onyali timo cikirok kodin, ŋey iter go paka ŋeca cil gi cil?

⁵Inonyal tuko gine paka ituko gi winyin, kosa paka gituko ri nyikin?

⁶Jokitoga rec jonyal goyo welo mere? Jomitan jonyal poko i dier jo?

⁷Inyalo poŋo i pien mere siŋenge, kosa cwowo wic mere gi bithi.

⁸Gey go dicel ama, aka ikilatemo geyo go kendo, wiyin k'owil gi lweny nago.

⁹Kisi ŋata neno Leviathan gi waŋe rumo gi geno, meni loyo aka nyocere piny.

¹⁰Ongoye ŋata ger manyalo kwinyo go, ongoye ŋata nyalo temo cungo ruwaŋe.

¹¹Ŋa m'otieko monjo go, ŋey acul go, ŋa i piny gibe?

¹²Akilaliŋ waco kwoŋ lembe, kosa meni pere madwoŋ, kosa ŋono m'ocwey'iye.

¹³Ŋa manyalo yeco woko pien mere ma woko? Ŋa manyalo cwowo to tundo i pien mere mar'ario?

¹⁴Ŋa manyalo miyo go yawo lake ma poŋ? Lake thoko i iye je kelo lworo.

¹⁵Dieŋeye ocweyere gi bol ma kwote, m'odhikere kanyacel matek paka tele.

¹⁶Kisi moro orikere kwoŋ nyawote, ma luya kinyal donjo i diere.

¹⁷Joridhere matek kanyacel, m'ongoye gim'anyalo poko jo.

¹⁸Go giro mac maliel, aka waŋe liel paka waŋceŋ ma gulo.

¹⁹Mac wok i dhoke, aka kur mac kire woko.

²⁰Yiro wok i ume, paŋini dak m'ited'iye kosa mbirabira ma waŋ.

²¹Ywe pere kudho mac to liel, aka mac wok i dhoke.

²²Ŋute tek swa, ma kisi ŋat'oromo gine bwok.

²³Delkwoŋe dole m'ocokere kanyacel, aka tek m'oridhere ma kigonyere.

²⁴Cunye tek paka tele, tek paka tele ma rego.

²⁵Ka go oay malo, jomeni je jobwok, jopoŋ gi lworo to joringo.

²⁶Ongoye abor manyalo cwowo go, kosa thir, kosa asere, kosa toŋ.

²⁷Cuma cal rigo kanja, aka ywel cal rigo mbawo m'otop.

²⁸Asere kinyal miyo go ringo, asumulu cale rigo cuŋ.

²⁹Abiro cale rigo cuŋ, aka go nyero ka ocel kwoŋe toŋ.

³⁰Magambala ma iye cale thago dak, aka golo piny i cwodho paka magal.

³¹Go miyo lutho walo paka pi, aka miyo twak paka dak mo.

³²Go weyo bathe maler cen, ma dhano nyalo paro ni nam omako lwar.

³³Ongoye gima pimere gine i piny, obedo cwec m'ongoye gi lworo.

³⁴Go ŋiyo kisi gima nitie malo, go obedo kere pa jonoro je.