Read dhopadhola Yobu 5 Bible Online

Yobu 5 - dhopadhola bible

Yobu 5

¹Lwoŋ pama, Yobu, neni ka dhano odwokin. Nitie jomalaika m'ilawire bongi jo?

²Adieri paro neko jomamiŋ, aka nyeko neko joma nyap.

³Atieko neno ŋatamiŋ lokere madwoŋ, to akwoŋo peco pere abwap.

⁴Nyithindho pere jokibedi i siem, iŋinyo woko jo i waŋkac, aka ongoye ŋata kwonga jo.

⁵Jokec jocamo cemo pa jamiŋo, kiri cemo m'odongo i kudhin, aka joriyo jomako nyeko gi lim pere.

⁶Rem kiwoki i piny, aka teko kiwoki i lowo.

⁷Kisi dhano nywole ri teko, paka mac gaŋere malo.

⁸Paka ri an, alarango Were, aka alakiosa banja paran bongi go.

⁹Go timo gigipiny madongo aka m'opanere, gigipiny ma gir'aura ma kikwanere.

¹⁰Go miyo koth i piny, aka dhieko ndelin.

¹¹Go tiŋo malo jono ma jonitie piny, aka miyo jono ma joywak kisangala.

¹²Go nyeko woko can pa joreco, ŋey gima jotimo kiyindira.

¹³Go mako jorieko i can pajo wegi, aka nyeko woko mito pajo piyo.

¹⁴Joromo gi mudho odieceŋ par, aka jomudamuda odieceŋ paŋini wor.

¹⁵To go botho jacandi kwoŋ tho, gi ji ma jongoye gi nyalo wok iy'adica.

¹⁶Go miyo jocandi geno, aka mwono dhok jokidakana.

¹⁷Jasilwany a ŋata Were tiro, riameno ikir'icay gir'acula ma Jameni miyo.

¹⁸Go miyo adhola, to mado, go miyo litho, to cingi go cango.

¹⁹Go labothin kwoŋ teko aucel, iy'abirio ongoye raco ma lageyin.

²⁰I kec, go labothin kwoŋ tho, aka i lweny go labothin tho g'abor.

²¹Were labothin kwoŋ misegey, aka ikilabedo gi lworo ka rerok obin.

²²K'akaka gi kec obin, ilanyero, aka ikilalworo ogwaŋe madudi ma piny.

²³Ilatimo cikirok gi telin madudi, aka ilabedo i siem g'ogwaŋe madudi.

²⁴Ilabedo i siem i wema perin, aka k'ikaŋasa mwendi perin, ikilanwaŋo ni nitie m'orwenyo.

²⁵Ilaŋeyo ni ilabedo gi nyikwayin kweth, aka jolacale lum ma piny.

²⁶Ilatho kareno itieko ti, paka withi ŋano tegino i hongo ma keco.

²⁷Neni, watieko kikaŋasa gime, obedo adieri, winji kwoŋe, ŋey in won iŋey.