Read dhopadhola Yobu 6 Bible Online

Yobu 6 - dhopadhola bible

Yobu 6

¹Kenyo Yobu odwoko ni,

²Kabedi oyido inyalo kipima rem paran, kanyacel gi teko paran!

³Dinyo opek loyo kwoyo ma nam, riameno wac paran okwakere.

⁴Kole asere pa Jameni Je otieko celan, aka amadho kwir mere, Were odhiro bwok kwoŋan.

⁵Punda bende geŋisa ka camo lum, aka dhiaŋ bende cemo m'oliŋ?

⁶Gima bothi bende icamo m'ongoye cumbi, kosa gima pige both bende nitie gi mito?

⁷Awanya paran ma cemo ongoye kwoŋ nger cemo no, kwoŋbedo jocale ran cemo ma cunyan odak.

⁸Kabedi oyido anyalo tiŋo malo ywak paran, aka Were womiyan gim'ayenyo.

⁹Kabedi Were wonekan, ka bedi go wolwogi cinge to nekan.

¹⁰Dinyo gime oyomo cunyan, dinyo asangala makada nende litho paran dwoŋ.

¹¹Nikune meni ma fodi anyalo kure gine makwo? Gike paran obedo aŋo, ma d'omiyan abedo moth?

¹²Kosa atek paka tele, kosa delkwoŋan ocwey gi ywel?

¹³Ongoye nger m'anyal konyirok'iye, aka arumo gi rieko.

¹⁴Jono ma jokwero nyutho mere pajo wor, jokilwor Jameni Je.

¹⁵Merin paran jor'akor, paka pi ma mol kadho wok i malawa.

¹⁶Jomakere paka pe, aka jonyidho paka pe.

¹⁷I hongo ma lietho joleny woko, aka jothwo woko.

¹⁸Jowiyo royo pajo, jokadho i laro to jorwenyo woko.

¹⁹Jowoth ma Teman jorango, aka jowoth ma Seba bende jorango jo swa.

²⁰Cuny jo oŋedhere kwoŋbedo oyido jogeno, jotundo, aka jodoŋ dhier.

²¹Ameno apaka witieko lokere ran, wineno teko paran, aka wibwok.

²²Atieko ye kwayo win mic, wok i lim mewin?

²³Atieko ye kwayo win bothan wok i cingi jakwor, kosa wok i cingi jomaker?

²⁴Fonjan, aka alaliŋ, aka titi ran kama akom'iye.

²⁵Waco gim'otire litho jo, to gim'iwaco ongoye kony.

²⁶K'iparo ni aluwo koyo, raŋo idwoko wac paran ma rem?

²⁷Kole inyalo mako nyeko gi nyathi kic, aka inyalo kiri goyo welo kwoŋ mere perin.

²⁸Riameno yere ŋiyan, aka akilatwodo ruwaŋin.

²⁹Mondo wire aka Ikir'itim komo, kole fodi atimo gim'otire.

³⁰Atieko ye luwo twodo, kosa akinyali poko bero kwoŋ teko?