Read dhopadhola Zabuli 10 Bible Online

Zabuli 10 - dhopadhola bible

Zabuli 10

¹Awi Rwoth, raŋo initie bor? Raŋo ipondo riwan i hongo ma teko?

²Jokidakana jonor aka jocando jocandi, weyi jowomoki i bwo ma wegi jociko.

³Jokidakana jokwot ro awanya pajo marac, joworo jokwero to jokwoŋo Rwoth.

⁴Jokidakana jokidew kwoŋ Rwoth, joparo ni Were ongoye.

⁵Gima jokidakana jotimo yindira i hongo je. Jokiniaŋ nger ma Were thum'iye banja, aka jopelo jokwor pajo je.

⁶Joparo i cuny gin ni ongoye gima bwoko jo, aka jokinyal podho i teko.

⁷Luwo pajo opoŋ lam, twodo, g'atise, aka jokwako luwo wac dakirok gi gimarac.

⁸Jotimo apondi i calin, joneko joma bubanja nyaliŋliŋ. Jokiyo jokwor pajo aliwa.

⁹Jokuro kam'opondo paka simbwore. Jokiyo jocandi, jomako jo i bwo pajo to jokadho gi jo.

¹⁰Ji ma bu gimoro joŋinyere, jomunyere piny, aka jopodho gi meni pa jokidakana.

¹¹Jokidakana joparo i cuny gin ni Were wiye owil, opano waŋe aka kilaneno jo.

¹²Ay, Awi Rwoth, Were imiy jokidakana gir'acula! Poyi jono ma jocandere.

¹³Raŋo jokidakana jocayo Were, aka jowaco i cuny gin ni, “Were kilamiyan gir'acula?”

¹⁴T'ineno, aka iŋiyo teko gi candirok, iyikere konyo ma noknok. Ji ma bu gimoro jomiyere rin, aka noknok ikonyo nyithindho kic.

¹⁵Tur meni pa jokidakana gi joreco, miy jo gir'acula ro komo ma jotimo, cuka jowey timo kendo.

¹⁶Rwoth obedo kere cil gi cil. Ji ma jolamo werin man, jobino rere wok i lowo pere.

¹⁷Awi Rwoth, ibino winjo kwayo pa ji ma jomwol, aka ibino miyo jo miseni.

¹⁸Ibino winjo ywak pa ji m'idiyo jo gi nyithindho kic, ibino thumo banja i thenge pajo, ŋey dhano m'obedo fukefuke wokiri wokel teko kendo.