Read dhopadhola Zabuli 109 Bible Online

Zabuli 109 - dhopadhola bible

Zabuli 109

¹Ikir'iliŋ, Awi Were m'apako.

²Kole jokidakana gi jotwodo jomonjan. Jowaco twodo kwoŋan,

³aka joluwo raco kwoŋan, jomonjan m'ongoye atoŋa.

⁴Jokiyere kodan, makada nende anyutho jo mar, kucel akwayo rijo.

⁵Ameno joculan raco ri bero, dakirok ri mar.

⁶Jowaco ni woyeri jakidakana wothum rigo banja; weyi jakwor pere won wosegeya go.

⁷Ka oosa go weyi wonwaŋi kwoŋe banja, aka kiri kwayo pere je okwan paka reco.

⁸Weyi ndelo pere wobedi manok, weyi ŋatiman woter tic pere.

⁹Weyi nyithindho pere jowobedi kic aka cege wobedi citho.

¹⁰Weyi nyithindho pere jowolera aka jowokwayere, weyi woriem jo wok i gunda ma jobed'iye.

¹¹Weyi ji ma jobanja go jowomaki gigipiny pere je, aka weyi jokicar jowonyaga gim'otieko tiyo to limo je.

¹²Wongoye ŋata wotim gi go wor, kosa wodew kwoŋ nyithindho kic m'owey cen.

¹³Weyi nyikwaye je jowotho, aka weyi nyinge worweny i luse ma luwo.

¹⁴Weyi Rwoth wopoy reco pa kwarere pere, aka wokiri wocwaki reco pa min.

¹⁵Weyi Rwoth wopoy reco pajo noknok, aka jo wegi wokiri wopoy jo i piny.

¹⁶Kole jalo k'oparo kwoŋ nyutho wor, to ocando to neko, jocandi, ji ma bu gimoro, kodi ji manyap.

¹⁷Oyido omaro kwoŋirok, weyi lam wobin kwoŋe. Oyido odak miyo silwany, weyi wobedi bor gine.

¹⁸Oruko kwoŋe lam paka ruk pere, weyi wobile kwoŋe paka pi, paka mo i cokin pere.

¹⁹Weyi wobedi paka nanga ma mino kwoŋe, paka dende ma tweyo kisi ndelo.

²⁰Rwoth, miy jokwor paran gir'acula ameno, jono ma joluwo raco kwoŋan.

²¹To in, Awi Rwoth, Rwoth paran, osa ran ro nyingin, aka bothan ro bero ma mar perin makiwire.

²²Kole ajacandi, aka abu gimoro, litho nitie i cunyan.

²³Arwenyo paka tipo othieno, aduny paka bonyo.

²⁴Congan nyap ro ngoye pa cemo, delkwoŋan odoŋ pien gi cokin.

²⁵Abedo ginyero ri ji ma josegeya an, ka jonenan, joyengo wi gin.

²⁶Konyan, Awi Rwoth Were paran! Bothan cungo kwoŋ mar perin makiwire.

²⁷Weyi jowoŋey ni me cingin; in Rwoth, iŋat'itieko timo.

²⁸Weyi jowokwoŋ, t'ilamiyo silwany. Weyi jomisegey paran wi gin wokwoti, aka weyi ŋeca perin wosangala.

²⁹Weyi wi jokwor paran wokwoti, weyi joworuki wickwot pajo paka kanzu.

³⁰Alamiyo Rwoth foyo madwoŋ maloyo gi dhokan. Alapako go i dier cokirok madwoŋ pa ji.

³¹Kole go gwoko jocandi, aka botho jo kwoŋ ji ma jothumo rijo banja ma tho.