Read dhopadhola Zabuli 115 Bible Online

Zabuli 115 - dhopadhola bible

Zabuli 115

¹Ki riwan, Awi Rwoth, ki riwan, to nyingin womiy dwoŋ, ro mar perin makiwire kodi adieri perin.

²Raŋo nonin jowopenji ni, “Were mewin nitie kune?”

³Were mawan nitie i polo, go timo gima sangala go je.

⁴Werin pajo otim gi feza gi zahabu, tic ma cingi ji.

⁵Jonitie gi dhok gin, to jokiluwi, waŋ gin, to jokinen.

⁶Jonitie gi ithi gin, to jokiwinji, um gin, to jokiŋwey.

⁷Jonitie gi cingi gin, to jokimul, tiendi gin, to jokiwothi, aka dwondi gin kiwinjere.

⁸Jono ma jotimo jo jocale paka jo; amanago apaka obedi kiri ri jono ma joketho geno pajo i cal.

⁹Awi Isiraili, geni i Rwoth! Go obedo kony perin gi kwot perin.

¹⁰Awi ot pa Aron, kethi geno perin i Rwoth! Go obedo kony perin gi kwot perin.

¹¹Win ma wilworo Rwoth, geni win i Rwoth! Go obedo kony mewin kodi kwot mewin.

¹²Rwoth dewo kwoŋ wan, go bino miyo wan silwany; go bino miyo ot pa Isiraili silwany; to miyo ot pa Aron silwany.

¹³Go bino miyo silwany jono je ma jolworo Rwoth, mathindho gi madongo.

¹⁴Weyi Rwoth womiy win nyithindho, win gi nyikway win!

¹⁵Weyi Rwoth womiy win silwany, go m'ocweyo polo gi piny.

¹⁶Polo obedo apa Rwoth kende, to omiyo wot cwo piny.

¹⁷Jom'otho jokipaki Rwoth, kada jono ma jokidho piny m'oliŋ.

¹⁸To wabino pako Rwoth pama kodi cil gi cil. Rwoth wopak!