Read dhopadhola Zabuli 118 Bible Online

Zabuli 118 - dhopadhola bible

Zabuli 118

¹Miy Rwoth foyo, kole go ber; mar pere makiwire bedo cil gi cil!

²Weyi wowaci ni, “Mar pere makiwire bedo cil gi cil.”

³Weyi ot pa Aron wowaci ni, “Mar pere makiwire bedo cil gi cil.”

⁴Weyi jono ma jolworo Rwoth jowowaci ni, “Mar pere makiwire bedo cil gi cil.”

⁵Alwoŋo Rwoth i kidamba paran, Rwoth odwokan aka ogonyan.

⁶Ka Rwoth nitie i thenge paran, akilwor. Aŋo ma nyatoro nyalo timo ran?

⁷Rwoth nitie i thenge paran konyan; Abino neno k'ikengila jokwor paran.

⁸Ber pondo i Rwoth, loyo ketho geno i ji.

⁹Ber pondo i Rwoth loyo ketho geno i jotel pa ji.

¹⁰Jokwor oyido jothokan, t'areyo woko jo i nyingi Rwoth!

¹¹Oyido jothokan, jothokan i kisi thenge t'areyo woko jo i nyingi Rwoth!

¹²Jothokan paka kic, to jowaŋ woko paka mac i dier kudhin, areyo woko jo i nyingi Rwoth!

¹³Omonjan gi gero aka oyido ikengila an, to Rwoth okonyan.

¹⁴Rwoth obedo meni paran aka wer paran, go otieko bedo both paran.

¹⁵Winji wer ma loyo, i wema pa ji pa Were: “Cingi Rwoth maracuc otimo!”

¹⁶Meni pere okelo riwan loyo, meni pere matek i lweny!

¹⁷Akibino tho, abino kwo, t'awaco gima Rwoth otimo.

¹⁸Rwoth omiyan gir'acula malith, to k'oweyan atho.

¹⁹Yaw ran waŋkac ma Ot pa Rwoth, ŋey adonji afoy Rwoth!

²⁰Me waŋkac pa Rwoth; joma timo gim'otire kende ama jobino luw'iye.

²¹Afoyin Rwoth kwoŋbedo iwinjan t'imiyan loyo.

²² Tele ma jogeto jojwango ni bukony, onyo olokere tele ma sonda.

²³Me obedo tim pa Rwoth, obedo gir'aura ruwaŋ wan!

²⁴Me ndelo ma Rwoth am'oketho, weyi wafore aka wasangala i iye!

²⁵Both wan, wakwayin, Awi Rwoth, miy wan loyo, wakwayin, Awi Rwoth!

²⁶Jasilwany a ŋata donjo i nyingi Rwoth! Wamiyin silwany gi Ot pa Rwoth.

²⁷Rwoth obedo Were, go omiyo wan lero. Gi jangi yen i cingi win, cak win kalima aka wiŋanji thoko migam.

²⁸Ibedo Were paran, abino miyin foyo. Ibedo Were paran, abino waco dwoŋ perin.

²⁹Foy Rwoth, kwoŋbedo go ber; kole mar pere makiwire bedo cil gi cil!