Read dhopadhola Zabuli 143 Bible Online

Zabuli 143 - dhopadhola bible

Zabuli 143

¹Winji kwayo paran, Awi Rwoth; ciki ithin ri ywak paran! I genirok perin dwokan i tiro perin!

²Ikir'idonji i thumo banja gi ŋeca perin, kole ongoye dhano ma kwo m'otire ruwaŋin.

³Kole jakwor otieko rieman, otieko ŋinyo kwo paran piny, otieko miyan bedo i mudho, pa ŋat'otho cango.

⁴Riameno cunyan podho i iyan, adundo paran oŋedhere i iyan.

⁵Apoyo hongo macon, aparo kwoŋ gim'itieko timo, aparo kwoŋ gima cingin otieko timo.

⁶Ayaro rin cingan je woko, cunyan riyo neko rin paka piny m'opalipat.

⁷Ikir'igal gi dwokan, Awi Rwoth! Cunyan podho! Ikir'ipan ran waŋin, rupiri anyalo bedo paka jono ma jokadho piny i bur.

⁸Weyi awinji kwoŋ mar perin makiwire odikin, kole aketho geno paran i in. Fonjan royo m'aripo luwo, kole atiŋo adundo paran rin.

⁹Bothan, Awi Rwoth, kwoŋ jokwor paran! Atieko ringo bongin ni ipanan!

¹⁰Fonjan timo gim'iyenyo, kole iŋat'ibedo Were paran! Weyi cunyin maber wotelan i royo ma bu teko.

¹¹Ro bero ma nyingin, Awi Rwoth, both kwo paran! I tiro perin wodhan i teko!

¹²Aka i mar perin makiwire neki jokwor paran, reyi woko jokwor paran je, kole abedo ŋeca perin.