Read dhopadhola Zabuli 147 Bible Online

Zabuli 147 - dhopadhola bible

Zabuli 147

¹Pak Rwoth! Kole ber wer pak ri Were mawan, kole go ber, aka otire wero pak rigo.

²Rwoth geto Yerusalem, go coko ji ma jonitie woko ma piny Isiraili.

³Go botho ji ma cuny gin otur, to tweyo adholin pajo.

⁴Rwoth ama ridho welo ma micalin, to miyo joje nyingi jo.

⁵Rwoth mawan dwoŋ, aka thoth gi meni; niaŋ pere kipimere.

⁶Rwoth tiŋo malo jomamwol, to ŋinyo jokidakana piny.

⁷Wer ri Rwoth gi foyo, wer ri Were gi tongol!

⁸Go umo polo gi pondeponde, go yiko koth ri piny, go miyo lum twi i wi tendere.

⁹Rwoth miyo ogwaŋe cemo pajo, gi nyithindhi agakere ma joywak.

¹⁰Kisangala pere ongoye i meni pa kayinin, kosa i meni pa jolweny ma jomiseni,

¹¹to Rwoth siemere i jono ma jolworo go, i jono ma jogeno i mar pere makiwire.

¹²Pak Rwoth, awi Yerusalem! Pak Were perin, awi Zayon!

¹³Kole go ridho nywenye ma waŋkace perin, go miyo wot win silwany i dier win.

¹⁴Go timo siem i kewere mewin, go yeŋo win gi ŋano m'onuŋere.

¹⁵Go wodho or ri piny, wac pere dwir.

¹⁶Go yaro pe paka pien rombo, go kedho fumbi paka buru.

¹⁷Go dhiro pe paka tele gu, ŋa manyalo cungo i ŋico pere?

¹⁸Rwoth dhiro wac pere, to lenyo jo, go miyo koyo pere kudho, to pi mol.

¹⁹Go wodho wac pere kamaler ri Yakobo, fonji gi cik pere ri Isiraili.

²⁰Go fodi k'otimo ameno ri nonin man, jokuya cik pere. Rwoth wopak!