Read dhopadhola Zabuli 17 Bible Online

Zabuli 17 - dhopadhola bible

Zabuli 17

¹Awi Rwoth, winji ywak paran ri tiro, ciki ithin ri ywak paran ri kony, ciki ithin ri kwayo paran mar'adieri.

²Ibino thumo banja i thenge paran, kwoŋbedo iŋeyo gim'otire.

³Makada nende ikaŋasa cunyan, makada nende ibin bongan wor, makada nende ikaŋasa an kicutho, ikibino nwaŋo kwoŋan kidakana, dhokan kiluw reco.

⁴Akiluw gimarac paka joman. Atieko luwo or perin, aka akiluwo yo pa jor'akaka.

⁵Noknok awotho i yo perin, aka tiendan fodi k'ocer.

⁶Alwoŋin kwoŋbedo iladwokan, Awi Were, miyan ithin, winji wac paran.

⁷Nyuthi ji perin mar perin makiwire, Awi jaboth pa jono ma jodwaro kapondo, kwoŋ jokwor pajo i cingin maracuc.

⁸Kwonga an paka nyangil waŋin, kanan i tipo ma bwombin,

⁹kwoŋ jokidakana ma jomonjan. Jokwor ma jonek jothokan,

¹⁰jongoye gi wor aka joluwo gi noro.

¹¹Jothokan pama, kisi kam'awir'iye, jorango hola ma redhan piny.

¹²Jocale simbwor ma dwaro yeco gimoro, jomito yecan mathindho thindho.

¹³Ay, Awi Rwoth, imonji jokwor paran aka ikengila jo. Bothan kwoŋ jokidakana g'abor perin,

¹⁴bothan kwoŋ ji ma jonitie gi gima jomito je i kwo me. Miy jo gir'acula gi candirok m'ikano rijo, weyi wotundi kiri kwoŋ nyithindho pajo ma romo, aka man wodoŋ ri nyikway jo!

¹⁵To paka ri an, kwoŋbedo angoye gi komo, abino nenin, aka k'acew, bedo perin bino miyan kisangala.