Read dhopadhola Zabuli 19 Bible Online

Zabuli 19 - dhopadhola bible

Zabuli 19

¹Polo nyutho dwoŋ pa Were, aka wodho kamaler tic ma cingi Were.

²Kisi ndelo langa ri nyawote, kisi wor luda ri nyawote.

³Luwo kosa wac ongoye, ongoye mayindo ma winjere,

⁴kucel mikwenda pajo winjere ri piny gibe, aka winjere kiri i gike piny. Were otimo peco ri waŋceŋ i polo

⁵ma wok odikin paka jamweha, paka jaŋwec m'omaro swa ŋwec.

⁶Cako liel i gike acel ma polo aka ŋado kadho i gike ca. Ongoye gima nyalo pondo kwoŋ lietho pere.

⁷Cik pa Rwoth ongoy'iye komo, miyo meni manyen. Gima Rwoth waco genere, miyo rieko ri ji ma jongoye gine.

⁸Cik pa Rwoth otire, aka ji ma jokuro josangala. Or pa Rwoth cil miyo niaŋ ri nyaŋith.

⁹Lworo Were ber, bedo cil gi cil. Thumo banja pa Rwoth otire, bedo i kare noknok.

¹⁰Ber loyo zahabu, kiri zahabu macil, mit loyo mo kic, kiri mo kic mar'apedo.

¹¹Miyan, ŋeca perin rieko, aka nitie kemba madwoŋ i kuro.

¹²To ŋa manyalo neno komo pere? Bothan, Awi Rwoth, kwoŋ komo m'opanere!

¹³Gwokan bende kwoŋ timo reco m'aŋeyo, ikir'iwey jowothuman. Kenyo abino bedo m'ongoye apuse, aka m'agonyere kwoŋ raco ma timo reco.

¹⁴Weyi wac ma wok i dhokan gi paro ma cunyan, wobedi ma yere ruwaŋin, Awi Rwoth, tele paran aka jaboth paran!