Read dhopadhola Zabuli 22 Bible Online

Zabuli 22 - dhopadhola bible

Zabuli 22

¹Were paran, Were paran, raŋo ijwangan? Raŋo initie bor m'ikikonyan, ma kiuja paran kitundi bongin?

²Awi Were paran, aywak rin odieceŋ, t'ikidwokan, Alwoŋin wor, t'akinwaŋ ywomirok.

³Kucel ibedo ŋataleŋ, ŋata Isiraili pako.

⁴Kwarere mawan joketho geno pajo i in; jogenin, t'ibotho jo.

⁵Joywak rin t'ibotho, jogenin aka ibotho jo.

⁶T'onyo akical dhano kendo, acalo kudin, ma kisi nyatoro cayo aka dak!

⁷Kisi ŋata nenan jwiyan, jopelan aka joyengo wiy gin.

⁸Jowaco ni, “Iketho geno perin i Rwoth, raŋo go kibothin? Ka Rwoth omarin, raŋo go kikonyin.”

⁹Kucel in iŋat'iwodhan maber munyo inywolan, aka munyo fodi abedo nyathi, ikuran maber.

¹⁰Atieko genin wok i ndelo m'anywol'iye, aka noknok ibedo Were paran.

¹¹Ikir'ibedi bor kodan, kole teko nitie cegin, aka ongoye ŋat'okony.

¹²Jokwor kweth jothokan paka thwondhe, joje jothokere kwoŋan, paka thwondhe mager ma jowok i piny Basan.

¹³Joyawo dhok gin paka simbwore, ma johola aka jomito yecan mathindho thindho.

¹⁴Meni paran orumo, paka pi m'okire piny. Cokin paran jowok i kogino, cunyan cal odok m'oleny.

¹⁵Lokoro paran othwo paka fukefuke, aka lewan moko i dandan. Itieko weyan ri tho i fukefuke.

¹⁶Kitipa pa ji mareco jothokan, paka dwol gwokere jothokere kwoŋan, joyeco cingan gi tiendan.

¹⁷Anyalo kwano cokin paran je, jokwor paran joŋiyan ma jokikwany waŋ jo.

¹⁸Joparo nangin paran, aka jopoko.

¹⁹To in Rwoth, ikir'ibedi bor kodan! Biye piyo ibothan!

²⁰Bothi adundo paran kwoŋ abor, bothi kwo paran kwoŋ gwokere me.

²¹Bothan kwoŋ simbwore me, angoye gi kony ruwaŋ thwondhe me.

²²Abino waco ri ji paran gim'itieko timo, abino pakin i cokirok pa ji.

²³Win ma wilworo Rwoth, pak win go, win nyikway Yakobo miy win Rwoth dwoŋ, aka win Joisiraili lam win go.

²⁴Go kikwer kosa cay jocandi, to winjo ywak pajo ri kony, go kipan rijo waŋe, to winjo ywak pajo.

²⁵Abino pakin i cokirok pa ji ro gim'itieko timo, abino miyo cowirok m'aciko ruwaŋ jono ma jolamin.

²⁶Jocandi jolacemo to joyeŋ, jono ma jorango Rwoth jolapako go! Weyi jowoyindira i kisi gima jotimo.

²⁷Nonin je jobino poyo Rwoth. Woki i kisi thenge ma piny jobino wire bonge, to jolamo go.

²⁸Kole Rwoth obedo kere aka dhumo nonin je.

²⁹Jonoro je jobino kule piny rigo, aka gima tho je bino kule piny rigo.

³⁰Luse ma yuwaŋe jobino tiyo rigo, jobino waco ri luse ma yuwaŋe kwoŋ Rwoth.

³¹Ibino waco ri ji ma fodi k'onywol ni, “Rwoth obotho ji pere.”