Read dhopadhola Zabuli 25 Bible Online

Zabuli 25 - dhopadhola bible

Zabuli 25

¹Atiŋo adundo paran rin, Rwoth.

²Aketho geno paran i in Were paran, ikir'iwey wiyan wokwoti, ikir'iwey jokwor paran jowonyeran.

³Ikir'iwey jono ma joketho geno pajo i in wi jo okwoti, to weyi jono ma jogwenyere kwoŋin ama jowobedi gi wickwot.

⁴Miyan aŋey yo perin, Awi Rwoth, aka fonjan yo perin.

⁵Telan iy'adieri perin, aka fonjan kole in ibedo Were ma both paran. Kole noknok aketho geno paran i in.

⁶Awi Rwoth, poyi wor perin gi mar perin makiwire, m'itieko nyutho wok cene.

⁷Cwaki reco paran gi komo paran ma soye, cungo kwoŋ mar perin makiwire poyan, ro bero perin Rwoth!

⁸Rwoth ber aka otire, riameno go fonjo joreco yo ma joripo luwo.

⁹Go telo ji ma jomwol timo gim'otire, aka fonjo jo yo pere.

¹⁰Yo pa Rwoth je obedo mar makiwire g'adieri, ri jono ma jokuro cikirok pere gi fonji pere.

¹¹Ro nyingin, Awi Rwoth, cwaki reco paran, kole jothoth.

¹²Ŋa ma lworo Rwoth? Ŋato ama Rwoth bino fonjo yo ma go ripo luwo.

¹³Go won bino kiyindira i kisi gimoro, aka nyithindho pere jobino lunjo lowo.

¹⁴Rwoth mako mere gi jono ma jolworo go, aka nyutho cikirok pere rijo.

¹⁵Aketho waŋan kwoŋ Rwoth kisi hongo, aka go fudho tiendan wok i bwo.

¹⁶Wire bongan Rwoth, aka imaki kodan wor kole anitie kakendan aka angoye gi meni.

¹⁷Bothan kwoŋ paro mar'adundo paran, aka iwodhan wok i kidamba paran.

¹⁸Dew kwoŋ kidamba paran gi candirok paran t'icwako reco paran.

¹⁹Neni jokwor kweth m'anitie gine, aka nen nger ma jodakan'iye gi maker.

²⁰Kwonga kwo paran, t'ibothan, ikir'iwey wokwoti wiyan, kole abino pondo bongin.

²¹Ro bero g'adieri, kwonga an, kole akurin won.

²²Both Isiraili, Awi Were, wok i teko pere je.