Read dhopadhola Zabuli 33 Bible Online

Zabuli 33 - dhopadhola bible

Zabuli 33

¹Fore win i Rwoth, win ma witimo gim'otire, pak ber ri jono ma jotimo gim'otire.

²Pak win Rwoth gi tongol, wer win rigo gi tongol ma waya apar.

³Wer win rigo wer manyen, goy win tongol gi ndijo, aka wikoki ri kisangala.

⁴Wac pa Rwoth otire, aka tic pere je itimo iy'adieri.

⁵Rwoth omaro timo gim'otire gi tiro, mar pere makiwire opoŋ i piny.

⁶Rwoth ocweyo polo gi cik pere, waŋceŋ, dwe, kodi micalin gi wac m'owok i dhoke.

⁷Ocoko pi ma nam kanyacel, ocego lutho ma wakawaka madongo i udi ma kakan.

⁸Piny je wolam Rwoth! Weyi nonin je ma piny jowobwonere rigo!

⁹Go oluwo, to piny cweyere, luwo i cik pere gigipiny je oneno.

¹⁰Rwoth geŋo woko atoŋa pa nonin, go geŋo jo timo can pajo.

¹¹To can pa Rwoth cungo cil gi cil, atoŋa pere ongoye gi gike.

¹²Josilwany a nono ma Were pajo obedo Rwoth, ji ma go oyero paka ji pere won.

¹³Rwoth ŋiyo piny wok i polo, aka neno ji je.

¹⁴Go ŋiyo piny gi kama dhum'iye, ji je ma jokwo i piny.

¹⁵Go m'ocweyo cuny joje, oŋeyo gima jotimo je.

¹⁶Kere kibothi ro jolweny pere madwoŋ, jalweny kiloy lweny ro meni pere.

¹⁷Kayinin ma lweny jongoye kony ri loyo lweny, meni pajo madwoŋ kinyal botho.

¹⁸Adieri Rwoth como waŋe kwoŋ jono ma jolworo go, jono ma jogeno mar pere makiwire.

¹⁹Go botho adundo pajo kwoŋ tho, aka kuro jo makwo i hongo ma kec.

²⁰Waketho geno mawan i Rwoth, go kwonga wan aka konyo wan.

²¹Wasangala ro go, wageno nyingi go maleŋ.

²²Weyi mar perin makiwire wobedi gi wan, Awi Rwoth, ka waketho geno mawan i in.