Read dhopadhola Zabuli 35 Bible Online

Zabuli 35 - dhopadhola bible

Zabuli 35

¹Gwenyere gi jono ma jogwenyere kwoŋan, Awi Rwoth, aka lweny gi jono ma jolwenyo kodan!

²Kwany kwot gi kwot madwoŋ perin, aka ibin ikonyan.

³Tiŋi malo abor gi le perin kwoŋ jono ma jorieman. Cikan n'ibino bothan.

⁴Weyi jono ma jotemo nekan, wokengila jo aka wickwot omaki jo! Weyi jono ma jotimo can kwoŋan, woriem jo aka jowobedi i nywowirok.

⁵Weyi jowocal cuŋ ma koyo kudho, ka malaika pa Rwoth riemo jo!

⁶Weyi yo pajo wobedi mudho aka jowoceri, ka malaika pa Rwoth riemo jo.

⁷Jociko ran bwo m'ongoye kad'atoŋa, aka jokunyo ran bur maluth ma makan.

⁸To jobino rere woko mafodi jok'oŋeyo, wegi jobino moko i bwo pajo, jolapodh'iye to josika woko.

⁹Kenyo cunyan bino fore i Rwoth, abino kisangala kwoŋbedo obothan.

¹⁰Abino waco ri Rwoth gi cunyan je, “Ongoye ŋata cale in. Ikwonga ji ma jongoye gi nyalo kwoŋ jomatek, gi jocandi kwoŋ joma diyo jo.”

¹¹Jomisegey jomiyo mijulisi kwoŋan, aka josegeya an timo gigipiny m'akuya.

¹²Joculan raco ri bero, aka adoŋ kakendan.

¹³To an, munyo jotwo, aruko kutiya ariyo kec, akwayo gi wiyan piny,

¹⁴paka akwayo ri mere kosa omin an. Abedo pa ŋata ywako min, akule piny iywak.

¹⁵To munyo oyido anitie i teko, joje josangala, aka joriwere kanyacel nyero an. Jokicar jogoyan, aka jobedo ka jocwadan.

¹⁶Paka ji ma jonyero ŋat'oŋol, joŋiyan gi dakirok.

¹⁷Inoŋiya ŋiya nyaka kiri keraŋo Rwoth? Bothan kwoŋ kisinye pajo, bothan kwoŋ simbwore me.

¹⁸Kenyo abino foyin i cokirok pa ji perin, abino pakin ruwaŋ joje.

¹⁹Ikir'iwey jowosangala kwoŋan, jono ma jotimo kodan kwor m'ongoye atoŋa. Ikir'iwey jowodiem waŋ gin kwoŋan jono ma jodakan nono.

²⁰Jokiluwi siem, kwanyo woko jocwogo twodo nger je kwoŋ ji ma jomaro siem.

²¹Josegeya an, ka jokoko ni, “Waneno gim'itimo.”

²²To Rwoth, itieko neno gime. Riameno ikir'iliŋ Rwoth, ikir'ibedi bor.

²³Lweny Rwoth, ithielan, ay iosa ran, Were paran, Were paran.

²⁴Ibedo Rwoth ma timo gim'otire, riameno wac ni an abu banja, ikir'iwey jokwor paran jowonyeran.

²⁵Ikir'iwey jowowaci wegi ni, “Walaco go! Meno a gim'oyido wamito!”

²⁶Weyi jono ma jonyero candirok paran, wokengila jo kicutho aka jowobedi i nyawin, weyi jono ma jowaco ni jober loyan jowobedi giwickwot aka jowongoye gi wor.

²⁷Weyi jono ma jomito neno ni, omiyan loyo, jowokoki gi kisangala aka jowowaci kendo gi kendo ni, “Rwoth dwoŋ! Go winjo maber gi bero pa ŋeca pere.”

²⁸Kenyo abino waco ni itimo gim'otire, aka abino pakin ndelo je.