Read dhopadhola Zabuli 36 Bible Online

Zabuli 36 - dhopadhola bible

Zabuli 36

¹Reco luwo gi jakidakana, i lutho ma cunye, go kwedo Were aka kilwor go.

²Kole joparo malo swa kwoŋ gin, aka joparo ni Were kinyal ŋeyo reco pajo to thumo rijo banja.

³Wac ma wok i dhok jo opoŋ kidakana gi twodo jokitim gi rieko kosa bero kendo.

⁴Jotimo can marac gi kanindo pajo, ongoye gimaber ma jotimi, aka jokikwer gimarac.

⁵Awi Rwoth, mar perin makiwire tundo i polo, adieri perin yware kiri i pondeponde.

⁶Timo tiro perin cal gote, timo adieri perin cal lutho ma nam. Iŋat'idewo ri ji g'ogwaŋe.

⁷Mar perin makiwire dicwe, Awi Were! Nyithindhi ji jonwaŋo kabwok i bwombin.

⁸Wacamo cemo kweth m'imiyo wan, imiyo wan medho wok i malawa ma bero perin.

⁹Kole in iŋat'imiyo kwo, aka i lero perin waneno lero.

¹⁰Medere maro jono ma joŋeyin, gi timo bero ri jono ma jotimo gim'otire.

¹¹Ikir'iwey jomaker jowomonjan, kosa jokidakana joworieman.

¹²Neni kama jomarac jopodh'iye. Joriere kenyo ma jokinyal ay.