Read dhopadhola Zabuli 38 Bible Online

Zabuli 38 - dhopadhola bible

Zabuli 38

¹Awi Rwoth, ikir'imiyan gir'acula i nge perin!

²Imiyan adhola g'aserin perin, iredhan piny.

³Anitie i litho madwoŋ, kwoŋbedo nge perin, delkwoŋan gipi two ro reco paran.

⁴Amunyere i mikula mareco paran, jobedo ran bieto ma ciro tek.

⁵Adholin paran ŋwe aka top, kwoŋbedo miŋo paran.

⁶Akule piny, aŋinyere, aywak ndelo gipi.

⁷Awaŋ gi senyiga, aka anitie cegin gi tho.

⁸Aol, aka aŋinyere kicutho, cunyan rembo, aka acur gi litho.

⁹Awi Rwoth, iŋeyo gim'adwaro, iwinjo cur paran je.

¹⁰Cunyan gore, meni paran orumo, aka waŋan ocore.

¹¹Merin paran gi joger paran jokicore cegin kodan, kwoŋbedo adhola paran, kiri wade paran je jocore gicen.

¹²Jono ma jomito nekan jociko ran bwo, jono ma jomito miyan litho jotisa an, jokioli gi timo can kwoŋan.

¹³To acalo ŋata ithe otho, akinyali winjo, paka obadha ma kinyal luwo.

¹⁴Acalo ŋata kinyal winjo, gi ŋata kinyal dwoko wac.

¹⁵T'aketho geno bongin, Rwoth, aka in, Awi Rwoth Were paran, ibino dwokan.

¹⁶Kole akwayo, ikir'iwey jokwor paran jowonyeran, ikir'iwey jowosangala ka tiendan ocer!

¹⁷Kole acegin podho, aka anitie i litho ma kikwe.

¹⁸Atuco reco paran, awinjo gine gi rem.

¹⁹Jokwor paran jokitwo aka jotek, jomore ma jodakan m'ongoye atoŋa.

²⁰Jono ma joculo raco ri bero, jogwenyere kodan kwoŋbedo atemo timo bero.

²¹Ikir'ijwangan, Awi Rwoth, ikir'ibedi bor, Were paran.

²²Kwakere konyan, Awi Rwoth, jaboth paran!