Read dhopadhola Zabuli 40 Bible Online

Zabuli 40 - dhopadhola bible

Zabuli 40

¹Akuro Rwoth moth; owire to winjo ywak paran.

²Oywayan wok i bur ma kakende, wok i kwoyo ma tho ma kwakere, to jengo tiendan i tele, to miyan anyono piny ma bu teko.

³Go oketho wer manyen i dhokan, wer ma pak ri Were mawan. Ji mathoth ma joneni jobino bedo gi lworo, aka jolaketho geno pajo i Rwoth.

⁴Jasilwany a ŋata geno Rwoth, ma riwere gi jonoro, kosa jono ma jolamo were ma k'adieri.

⁵Itieko timo gigipiny madit riwan, Awi Rwoth Were mawan, ongoye ŋata pimere kodin. Itimo riwan can ma gir'aura kweth, kabedi oyido atuci jo, welo pajo thoth ma kikwanere!

⁶Ikimiti cowirok kosa mic, ikikway mic awaŋa, kosa mic ma cwako reco.

⁷Kenyo awaco ni, “Neni, an e; fonji perin ran ondiki i Kitawo ma Cik.

⁸Amaro swa timo mito perin, Awi Were paran! Cik perin nitie i cunyan.”

⁹Awaco wac maber ni ibotho, i cokirok madwoŋ; neni, ak'owey waco, paka iŋeyo, Awi Rwoth.

¹⁰Akiliŋ gi wac ma both i cunyan, noknok aluwo kwoŋbedo g'adieri perin gi both perin. Akimuŋo mar perin makiwire gi timo adieri perin, i cokirok madwoŋ.

¹¹Awi Rwoth, ikir'iwey timo ŋono ran, weyi mar perin makiwire gi timo adieri perin wokuran noknok.

¹²Teko kweth othokan, thoth ma kikwanere, reco paran olacan, ma onyo akinyali neno, jothoth jokalo ye wiyan, cunyan podho.

¹³Sangala bothan Rwoth! Kwaki konyan!

¹⁴Weyi jono ma jodwaro nekan, jowobedi i nyawin aka wokengila jo kicutho. Weyi jono ma josangala ro teko paran woriem jo i wickwot.

¹⁵Weyi jono ma jojwiyan, jowobedi i wickwot ro kikengila pajo.

¹⁶To weyi jono je ma jorangin, jowofore to josangala. Weyi jono je ma jomaro both perin, jowowaci noknok ni, “Rwoth dwoŋ.”

¹⁷Paka ri an, ajacandi aka abu gimoro, to idewo kwoŋan Rwoth. Ibedo jakony paran aka jaboth paran ikir'igali, Awi Were paran!