Read dhopadhola Zabuli 44 Bible Online

Zabuli 44 - dhopadhola bible

Zabuli 44

¹Watieko winjo gi ithi wan, Awi Were, kwarere mawan jotieko waco riwan, kwoŋ gigipiny madongo m'itimo i hongo pajo, i hongo macon.

²Nger ma in won igweyo woko nonin gi cingin, t'iketho ji perin i piny pajo, nger m'imiyo nonin man gir'acula, t'igonyo ji perin.

³Kole k'obedo g'abor pajo wegi ma jomako gine piny no, kosa meni pajo ama k'omiyo jo loyo. To gi cingin maracuc, gi meni perin, gi lero ma bedo perin gi jo kwoŋbedo oyido isangala gi jo.

⁴Ibedo kere paran aka Were paran, imiyo ji perin loyo,

⁵aka luwo kwoŋin waredho piny jokwor mawan; luwo i nyingin wanyono piny jokwor mawan.

⁶Kole akigen asere paran, kosa abor paran kinyal konyan.

⁷To in itieko botho wan kwoŋ jokwor mawan, aka iketho jono ma jodak wan i nyawin.

⁸Watieko kwoto i Were noknok, aka wabino foyo nyingin cil gi cil.

⁹To pama itieko jwango wan t'iweyo wokengila wan, ikiŋanjo gi jolweny mawan kadho i lweny.

¹⁰Imiyo wan ringo kwoŋ jokwor mawan, aka jokwor mawan jonyaga wan.

¹¹Iloko wan paka rombo m'ikidho thumo, aka ikedho wan i dier nonin.

¹²Itana ji perin ri welo masisiri, igoyo welo ma malo rijo.

¹³Joger mawan joneno gim'itimo riwan, aka joŋalo wan to jonyero wan.

¹⁴Iloko wan gir'awaca i dier nonin, ginyero i dier ji.

¹⁵Ndelo je asewere, aka wickwot omakan,

¹⁶ro wac pa jor'aŋala gi joyet, ruwaŋ jokwor paran gi joma jodakan.

¹⁷Gime je otieko yimere kwoŋ wan, makada nende wiy wan k'owil kodin, kosa waturo cikirok perin gi wan.

¹⁸Cuny wan fodi k'ocile kwoŋin, kosa wakitangatanga i yo perin,

¹⁹m'ituro wan i dier ogwaŋe madudi, t'iumo wan gi mudho m'oasere.

²⁰Kabedi wiy wan wil gi nyingi Were mawan, kosa wakway were makicar,

²¹di Were k'oŋeyo gime? Kole go oŋeyo nyaliŋliŋ ma cuny jo.

²²To obedo ro in, am'omiyo ineko wan i hongo je, ikwano wan paka rombo m'ikidho thumo.

²³Cew! Raŋo inindo, Awi Rwoth? Ay malo! Ikir'ijwangi wan kicutho!

²⁴Raŋo ikano waŋin? Raŋo wiyin wil gi litho g'adica mawan.

²⁵Kole wapodho piny ma waŋinyere, wariere i fukefuke m'okengila wan.

²⁶Ay malo, biye kony wan! Gony wan ro mar perin makiwire.