Read dhopadhola Zabuli 45 Bible Online

Zabuli 45 - dhopadhola bible

Zabuli 45

¹Wac maŋon opoŋ oy i cunyan, k'acwogo wer me ri kere. Paka kalam pa jandiko maber, lewan oyikere gi wer me.

²Iŋat'iŋon loyo kwoŋ cwo je, okonji nema i dhokin, Were miyin silwany noknok.

³Koda abor perin i emin, kere ma jameni, i dwoŋ perin gi dhum perin.

⁴Gwec i meni perin i loyo, ri gwoko adieri gi tiro! Weyi cingin maracuc wofonjin tim ma kelo lworo.

⁵Aserin perin jobith, i cuny jokwor perin; nonin jogore piny i tiendin.

⁶Ker ma Were omiyin, yindira cil gi cil, luth perin ma dhum obedo luth ma tiro;

⁷aka imaro gim'otire t'idak kidakana. Riameno Were, Were perin otieko yerin, aka omiyin kisangala maloyo, m'omiyo kerin man.

⁸Kanzin perin joŋwe kur ma gigipiny maŋwe kur. Jower josangala in i muluwir m'okicin gi lak liec.

⁹I dier mondongo perin, ama nyikin jonwaŋer'iye, aka nyamicala ocungo i racuc ma kom ma dhum, oruko thiwino m'otimi gi zahabu ma Ofir.

¹⁰Winji, mweha pa kere, aka ciki ithin, wiyin wowil gi ji perin gi peco pa benin,

¹¹aka kere bino mitin ro ŋono perin; go obedo rwoth perin, winji go.

¹²Ji ma Tire jolakelo rin mic, joŋaŋo jolatemo rango wor perin.

¹³Nyar kere nitie i muluwir pere gi law m'okwoy gi uzi ma zahabu,

¹⁴Gi law pere m'oruwo rangi, ikwaŋo go bongi kere, gi wadi go ma fodi jokuya cwo, jokwaŋ pere joluwo go.

¹⁵Gi siemirok gi kisangala jobino, aka jodonjo i muluwir pa kere.

¹⁶In, kere paran, ilabedo gi wotin kweth ma jolalunjo kwarere perin paka kerin, aka ibino ketho jo jodhum ma piny gibe.

¹⁷Wer paran lamiyo ŋeyirok perin wobedi cil gi cil, aka kisi nyatoro bino pakin i luse je.