Read dhopadhola Zabuli 50 Bible Online

Zabuli 50 - dhopadhola bible

Zabuli 50

¹Were ma jameni je, Were obedo Rwoth, luwo aka lwoŋo piny gibe, wok yuwok ceŋ tundo yupodho ceŋ.

²Wok i Zayon maŋon, Were pilin.

³Were mawan bino, go kiliŋ, mac m'odheth nitie ruwaŋe, asur mager othoko go.

⁴Go lwoŋo polo, gi piny, ŋey wothum ri ji banja.

⁵Go waco ni, “Coki ran ji paran ma jotimo adieri, ma jotimo kodan cikirok gi cowirok!”

⁶Polo waco ni Were timo gi tiro, kole Were won obedo jathum banja.

⁷“Winji win, a ji paran, aka alaluwo A Isiraili, abino miyo mijulisi kwoŋin, An abedo Were, Were perin.”

⁸Akipusa in ro cowirok perin, mic awaŋa perin nitie ruwaŋan noknok.

⁹Kucel akilajolo thwon wok i ot perin, kosa wod diel wok i sidwol perin.

¹⁰Kole kisi ogwaŋ ma lul obedo aparan, gi dhok ma wi tendere ganin.

¹¹Aŋeyo winyin ma koyo je, gi gigipiny makwo je i dudi.

¹²“Kabedi kec oyido nekan, dinyo ikiwaco riwin, kole piny gi gima nitie iye je obedo aparan.

¹³Acamo riŋo thwondhe, kosa amadho remo diegi?

¹⁴Miy Were cowirok ma foyo, aka cul Were madwoŋ loyo gim'iciko go je.

¹⁵Lwoŋan i hongo ma teko; alabothin, aka ilapakan.”

¹⁶To ri jakidakana Were waco ni, “Dwoŋ aŋo m'initie gine ma tuco or paran, kosa luwo kwoŋ cikirok paran?”

¹⁷Kole ikweran tirin, aka ibolo wac paran yuŋeyin.

¹⁸K'ineno jakwo, imako gine mere, aka imakere gi jocot.

¹⁹“Ituco reco gi dhokin, aka lewin yot cweyo twodo.”

²⁰Ibedo t'iwaco nyingi omin in, icwoko dhok wod pa yokin won.

²¹Gime itieko timo aka oyido aliŋaliŋa; oyido iparo ni acalo kodin. T'onyo pama apusa in, aka athango rin banja perin.

²²“Maki gime, in ma wiyin wil gi Were, kosa alareyin, aka ongoye ŋata bino bongin.

²³Ŋata kelo foyo pere paka cowirok pere miyan dwoŋ; ri ŋata wotho i yo m'otire, alanyutho go both pa Were!”