Read dhopadhola Zabuli 51 Bible Online

Zabuli 51 - dhopadhola bible

Zabuli 51

¹Maki wor kodan, Awi Were, cungo kwoŋ mar perin makiwire, cungo kwoŋ wor perin m'oasere, cidi woko reco paran.

²Lwoki woko raco paran, aka lonyan kwoŋ reco paran!

³Kole aŋeyo komo paran, aka reco paran nitie ruwaŋan noknok.

⁴Kwoŋin, in kende, ama atimo reco, aka atimo gimarac ruwaŋin. Ameno itire thumo ran banja, aka ingoye g'apuse ma thumo ran banja.

⁵Neni, abedo jareco wok i nywolirok paran, jareco munyo mama ogaman i iye.

⁶Neni, imito adieri ma cuny jo, riameno fonjan rieko i pal cunyan.

⁷Cidi woko reco paran, aka alalony; lwokan, aka alabedo matar loyo pe.

⁸Poŋan gi yodirok i kisangala, aka makada nende itieko ŋinyan t'ituran, alakisangala kendo.

⁹Ikir'inen reco paran, ywey woko raco paran.

¹⁰Miyan adundo macil, Awi Were, aka kethi cuny manyen, m'otire i an.

¹¹Ikir'irieman woko ruwaŋin, ikir'imayan cuny maleŋ perin.

¹²Dwoki ran kisangala ma both perin kendo, aka miyan adundo ma tur.

¹³Kenyo alafonjo joreco or perin, aka jolagik bongin.

¹⁴Koy kwo paran, Awi Were, aka bothan, aka alawero malo both perin.

¹⁵Yaw dhokan, Awi Rwoth, ŋey awer pak rin.

¹⁶Kole ikiyodere i cowirok, kosa dinyo amiyin; ikisangala gi mic awaŋa.

¹⁷Cowirok ma sangala Rwoth, obedo cuny ma tur, cuny m'otur aka mamwol, Awi Were, ikicay.

¹⁸Awi Were, maki wor gi Zayon, aka kony go; geti kendo kor ot ma Yerusalem.

¹⁹Nyaka ilakisangala gi cowirok m'otire, gi mic awaŋa gi mic ma gikululu, kenyo ilamiyin rwath i wi migam perin.