Read dhopadhola Zabuli 55 Bible Online

Zabuli 55 - dhopadhola bible

Zabuli 55

¹Ciki ithin ri kwayo paran, Awi Were ikir'iwir dieŋeyin ri ywak paran!

²Dew kwoŋan aka dwokan; teko paran olacan, anitie i teko.

³Abwok ri atise pa jokwor paran, aŋinyere g'adica pa jokidakana. Jokelo teko kwoŋan; jomako nge kodan aka jotimo ran kwor.

⁴Cunyan rembo, aka lworo ma tho ŋinyan.

⁵Lworo gi kirin opoŋ kwoŋan; apoŋ gi bwok.

⁶Kabedi oyido anitie gi bwomban paka akuro, dinyo ay gi bwomban t'anwaŋo kaywomirok.

⁷Adieri dinyo akadho kamabor swa, t'ageto peco paran i thim.

⁸Dinyo aredo nwaŋo kabwok paran kwoŋ koyo mager g'asur pi.

⁹Nywow luwo pa jokwor paran, Awi Rwoth! Aneno akaka gi gorok i tindi madwoŋ,

¹⁰thoko kore odieceŋ gi wor, opoŋ'iye neki gi teko.

¹¹Rerok nitie kisi kamoro; royo opoŋ adica gi banirok.

¹²Kabedi nende jakwor ama ŋalan, dinyo anyalo ciro; kabedi nende ŋata piemo kodan ama dele ran, dinyo apondo rigo.

¹³To obedo in, jawodhan, nyawotan aka mere paran m'aŋeyo.

¹⁴Oyido wanitie gi luwo ma nyadhano gi dhano aka walamo kanyacel i Ot pa Were.

¹⁵Weyi jokwor paran jowotho mafodi ndelo pajo; weyi jowokadhi piny i piny pa jom'otho ma fodi jokwo! Reco opoŋ pecin pajo gi i cuny gin.

¹⁶To alwoŋo Rwoth Were ri kony, aka go labothan.

¹⁷Odikin, odieceŋ gi wor kigeŋisa gi ywak paran kadho malo bonge, aka go lawinjo dwondan.

¹⁸Go ladwokan maber, wok i lweny m'alwenyo, kwoŋ jokwor paran madit.

¹⁹Were, m'odhumo wok cango, lawinjan to kengila jo; kole jokwero wirok, aka jokilwor go.

²⁰Nyawotan omonjo merin pere, oturo cikirok pere.

²¹Luwo pere oyido foth loyo mo dhiaŋ, to dakirok oyido opoŋ i cunye; Wac pere oyido yom paka mo, to adieri oyido yaŋo cuny jo paka abor mabith.

²²Weyi teko perin ri Were, aka go lagwokin; go kiwey wokengila joma jotimo gim'otire.

²³To in, Were, ilabolo jonek no gi jotwodo no i kaliel pajo, mafodi adec kwo pajo k'orumo. Paka ri an, alaketho geno paran i Rwoth.