Read dhopadhola Zabuli 56 Bible Online

Zabuli 56 - dhopadhola bible

Zabuli 56

¹Tim ran ŋono, Awi Were, rupiri omonjan; jokwor paran jolwenyo kodan hongo je.

²Odieceŋ gipi jokwor paran jomonjan, kole nitie ji mathoth ma jolwenyo kodan gi delok.

³Ka abwok, Awi Rwoth ma jameni je, aketho geno paran i in.

⁴Ageno i Were, akibwok, apako go ro gima go otieko ciko. Dhano adhana bende nyalo timo ran aŋo?

⁵Odieceŋ gipi jokwor paran jorango timo ran teko, hongo je jotimo can ma miyan litho.

⁶Jocokere kanyacel kam'opondo, joneno kisi gim'atimo ka jogeno nekan.

⁷Miy jo gir'acula, Awi Were, kengila jo gi keme perin.

⁸Iŋeyo paka acandere; itieko kano pigi waŋan, k'ondikere i kitawo perin?

⁹I ndelo m'anolwoŋin, ilariemo woko jokwor paran, gime aŋeyo, ni Were nitie i thenge paran.

¹⁰I Were, m'apako wac pere, i Rwoth, m'apako wac pere.

¹¹Ageno i go, aka lworo k'omakan. Dhano adhana bende nyalo timo ran aŋo?

¹²Awi Were, alatimo gim'atieko ciko, Alamiyin mic paran ma foyo.

¹³Kole itieko bothan kwoŋ tho, ey, igwokan podho, ŋey anyal wotho ruwaŋ Were, i lero ma kwo.