Read dhopadhola Zabuli 65 Bible Online

Zabuli 65 - dhopadhola bible

Zabuli 65

¹Awi Were, obedo gim'otire riwan pakin i Zayon to wakuro cikirok mawan rin,

²A in m'iwinjo kwayo! Ji je jolabino bongin,

³ro reco pajo. Reco mawan okengila wan, to icwako wan.

⁴Josilwany a jono m'iyero, ji m'ikelo bedo i kabedo perin maleŋ. Wabino yeŋ gi gigipiny mabeyo ma ot perin, silwany ma Ot pa Were maleŋ.

⁵Gi tim ma kelo lworo idwoko wan, t'ibotho wan, Awi Were jaboth mawan. Ibedo geno pa gike je ma piny, gi thoko nam ma jonitie bor loyo.

⁶In ma gi meni perin icweyo gote, ma nyutho meni perin madwoŋ.

⁷Iŋat'ikweyo mor ma nam, mor mar'asur pajo, gi gwenyirok pa ji.

⁸Ji jobedo i bwok, ro gigipiny madongo m'itieko timo. Tim perin miyo, koko ma kisangala winjere wok thengi piny me tundo i meca.

⁹Iwendo ri piny t'idhiro koth, iloko go m'oŋaŋ, ma diwa; malawa pa Were opoŋ gi pi, iŋat'ipoko jo cemo, me obedo yiko perin.

¹⁰Idhiro koth mathoth i ndelin m'ofur t'ibilo jo gi pi iyomo lowo gi nyidho aka imiyo gim'ofur twi.

¹¹Bero perin miyo keco m'owega; kisi kama ikadh'iye nitie mathoth.

¹²Kakwath opoŋ gi mwendi, tendere jopoŋ gi kisangala.

¹³Mwendi jopoŋ i sa, ŋano opoŋ i milelin, jokoko aka jowero kanyacel ri kisangala.